Ауыл шаруашылығы министрі фермерлермен кездесті

ҚР Ауыл шаруашылығы министрі Ербол Қарашөкеевтің Қазақстан фермерлерімен онлайн режиміндегі кездесуіне кәсіпкерлер, өңірлік әкімдіктер мен кәсіпкерлер палаталарының өкілдері қатысты. Онда Қазақ мал дәрігерлік ғылыми-зерттеу институтының ғылыми бағдарламасы аясында «Мал дерек» бағдарламалық өнімі әзірленіп жатқаны айтылды. Жаңа мобильдік қосымша ауыл шаруашылығы жануарларын бірдейлендіру деректер базасына жануарлар туралы ақпаратты қалыптастыру және беру процестерін автоматтандыруға, практикалық ветеринариялық қызметкерлерді қағазбастылықтан босатуға, мал шаруашылығы өнімдерінің эпизоотиялық жағдайын және қауіпсіздігін бақылау бойынша жұмысты сапалы жаңа деңгейге көтеруге мүмкіндік береді.

Ербол Қарашөкеевтің айтуынша, елімізде шамамен 1,6 млн жеке қосалқы шаруашылық бар. Былтыр онда ауыл шаруашылығы өнімдерінің 41,5% ( 2,6 трлн теңге) өндірілді. Алайда, жеке қосалқы шаруашылықтардың әлеуетін одан әрі дамытуда бірқатар мәселелер бар. Оның ең бастысы жеке қосалқы шаруашылықтардың қызметін реттеуге бағытталған заңнамалық базаның болмауымен байланысты.

– Ішкі нарықта мал шаруашылығы өнімдерінің жартысына жуығы өндірілетініне қарамастан жеке қосалқы шаруашылықтар мемлекет тарапынан қолдау алмайды, ал ұйымдасқан шаруашылықтар мемлекеттік қолдауға ие болып отыр. Мұндай әділетсіздікті жою қажет, – деген министр енді жеке қосалқы шаруашылықтарға көмек ұйымдасқан шаруашылықтар есебінен жүргізілмейтінін және бұл кооперация арқылы жеке көмек болатынын айтты. Онда сондай-ақ, Мемлекет басшысының тапсырмасы бойынша «Жеке қосалқы шаруашылық туралы» заң жобасы туралы да сөз болды. Кездесу соңында министр кеңеске қатысушылардың барлығына белсенді және жемісті жұмысы үшін алғысын білдіріп, барлық ұсыныстар мен түсініктемелер маңызды және министрліктің жоғарыда көрсетілген нормативтік актілерді жетілдіру жөніндегі алдағы жұмысында ескерілетінін айтты.

Е.Кебекбай, журналист.