Ауыл шаруашылығы саласында субсидиялауды бақылау күшейтілді - Роман Скляр

«Агроөнеркәсіпті субсидиялау механизмін жетілдіріп жатырмыз. Мемлекеттік органдар, қоғам, агробизнес өкілдері және Парламент депутаттарынан тұратын жұмыс тобы құрылды. Субсидиялаудың ең ұтымды нұсқасы әзірленді. Оның тиімсіз деген 10 түрі алынып тасталды. Өйткені, онда жемқорлық көп, бөліну тәртібі ашық емес. Қазір субсидиялау бағдарламасын бақылау күшейтіліп, кедергілер жойылды», - деді ол Сенаттың жалпы отырысында.

Айтуынша, субсидия беру процесі цифрлық платформаға көшіріліп жатыр. Ол мемлекеттік деректер базасына қосылған.

«Бәрі ашық, яғни субсидия бөлу кезінде жемқорлыққа жол берілмейді. Бұл платформа фермерлер үшін тегін болады. Ауыл шаруашылығы машиналарын жасау, тұқым және қызылша шаруашылығы, қант өнеркәсібін қолдау күшейтілді. Субсидия алушыларға да нақты міндеттер жүктеледі. Мұның барлығы субсидия беру жүйесін одан сайын жақсартады деп сенеміз», - деді Премьер-Министрдің бірінші орынбасары.

Сондай-ақ, Р. Скляр селекция мен тұқым шаруашылығын дамытудың жоспары әзірленгенін айтты. Тұқым сапасын бақылайтын және сертификаттайтын арнайы орган құрылады. Оған қоса, келесі жылы өсімдіктердің жаңа сорттарын қорғау жөніндегі халықаралық конвенцияға қосыламыз.

Сонымен қатар, мемлекеттік оқу гранттарының саны өскен. Ауыл шаруашылығы мамандықтарына 36 пайызға, ветеринарияға 12 пайызға, сондай-ақ ауыл квотасы да өсті.

«Аграрлық ғылымды қолдауға жыл сайын 8-9 млрд теңге бөлініп келеді. Еліміздің үш аграрлық жоғары оқу орнында халықаралық стандарттарға сай білім беріліп жатыр. Оқу бағдарламаларын әзірлеуге ауыл шаруашылығы, ветеринария сарапшылары және жұмыс берушілер қатысып отыр», - деді Р. Скляр.