Қазақстандықтар қандай сүтті таңдайды ?

Qalaisyn әлеуметтік зерттеулер платформасы, қазақстандықтардың сүт өнімдерін тұтынуына қатысты зерттеуінің нәтижесін жариялады. Сауалнамаға қатысқан 2300-ден астам тұрғынның 73%  Қазақстанда  өндірілген өнімді, 8% импорттық сүт өнімдерін тұтынатынын айтқан.  Сондай-ақ тұтынушылардың 43%  үй сүтін ұнататынын білдірген. Оны сатып алатындар негізінен Түркістан облысы мен Шымкент  тұрғындары екен.

Qalaisyn әлеуметтік зерттеулер жобасының жетекшісі Малика Атамбаеваның сөзіне қарағанда, тұтынушылық таңдауында сүт (92%), қаймақ (73%), айран (67%) және май (64%)  жоғары сұранысқа ие. Ал сүт пен кілегейден жасалған десерттер мен майлы айранды қазақстандықтар онша  ұната бермейді. Оларды жүйелі түрде сатып алатындар саны 7-18%  аралығында ғана.

Отандық сүт өнімдері Павлодар, Қызылорда, Қостанай және Ақмола облыстары мен Нұр-Сұлтан қаласында жоғары сұранысқа ие. Шетелдік өнімді Ақтөбе және Атырау облыстарының тұрғындары ең көп тұтынады екен.  Сүт өнімдерін таратудың басты нүктелері – азық-түлік дүкендері боп тұр. Сауалнамаға қатысқандардың  жартысы сүт өнімдерін азық-түлік дүкендерінен,  35% супермаркеттер мен әмбебап дүкендерден алады.  

         Жалпы Qalaisyn.kz – түрлі өнімдер мен тіршілік әрекеті салаларының дамуына ықпал ете алатын Қазақстанның белсенді тұрғындары арасында әлеуметтік және маркетингтік онлайн-сауалнамалар жүргізуге арналған панель. Онда  кез келген адам өзекті сұрақтарға жауап бере отырып, өз пікірін, азаматтық көзқарасын білдіре алады. Бұл компаниялар мен жеке тұлғаларға арналған социологиялық, брендтік, маркетингтік, brand lift және өзге де зерттеу түрлерінің онлайн-платформасы. Жоба қазақстандық Aitu-Dala компаниясы өнімдерінің бірі болып табылады. 2019 жылы құрылған бұл IT компания Қазақстан мен Орталық Азия нарығындағы интернет-медиа саласына бағдарланған.

Баспасөз қызметінің материалдары бойынша дайындаған Ерлік ЕРЖАНҰЛЫ