Биыл егіс алқаптарының көлемі 13,5 мың га артпақ

ҚР Ауыл шаруашылығы министрлігі 2022 жылғы егіс алқаптарының құрылымын 22,9 млн га құрайды деп болжап отыр. Бұл былтырғы көрсеткіштен 13,5 мың гектарға артық. Ауыл шаруашылығы тауар өндірушілерін тұқыммен, агрохимиямен, техникамен, қаржыландырумен және өзге де көмекпен қамтамасыз етудің мәселелерін үйлестіру мақсатында республикалық жедел штаб құрылған. Қазіргі уақытта тұқым жоспарға сәйкес 100% толтырылды, сараптамаға келіп түскен 1,5 млн тонна жаздық дақылдар тұқымының 90% тексерілді. Тексерілген тұқым көлемінің 99% кондициялы деп танылған, 88% егіс стандартының 1 және 2-класына сәйкес келеді. Алдын ала деректер бойынша, 2022 жылғы өнімге себілген тұқымының 5,7 %-ы элиталық тұқым, 95%-ы үшінші репродукциядан төмен емес тұқымдар.

Егіс науқанын өткізу үшін ауыл шаруашылығы құрылымдарында 141,7 мың трактор, 4300 бірлік өнімділігі жоғары егіс кешендері, 73,2 мың тұқым сепкіш, 221,2 мың топырақ өңдеу құралы бар. Республикада бір мезгілде бірнеше технологиялық операцияларды орындайтын қазіргі заманғы егіс кешендерінің 4300 бірліктен астамының болуы дәнді дақылдар алқаптарының 70% егуді жүзеге асыруға мүмкіндік береді.

Биылғы егіс жұмыстарын жүргізуге өңірлердің дизель отынына қажеттілік 400 мың тоннаны құрады, бұл өткен жылы бөлінген көлемнен 20 мың тоннаға артық. Айырмашылық қарды сақтау және ылғалды жабу жұмыстарын жүргізу қажеттілігіне байланысты болды. Өңірлердің қажеттілігі тиісті есептеулермен Энергетика министрлігіне жолданды.

Биыл минералды тыңайтқыштарды енгізу көлемі шамамен 695 мың тоннаны құрайды, бұл былтырғы көрсеткішінен 70 мың тоннаға артық. Дәстүрлі түрде сатып алынатын тыңайтқыштардың 60% 2 түрге – аммиак селитрасы мен аммофосқа тиесілі, бұлардың өндірісі Қазақстанда бар. Ауыл шаруашылығы тауар өндірушілерін аталған тыңайтқыштармен қамтамасыз ету мақсатында отандық зауыттардың басшылығымен келіссөздер жүргізілді, олардың нәтижелері бойынша ішкі нарықты толық қамтамасыз ету бойынша уағдаластықтарға қол жеткізілді. Көктемгі егіс жұмыстары басталысымен министрлік облыс әкімдіктерімен бірлесіп апта сайын минералды тыңайтқыштармен қамтамасыз етілу мониторингін жүргізетін болады. Олардың құнын субсидиялау мақсатында ағымдағы жылы 26,8 млрд теңге қарастырылған. 2022 жылы көктемгі егіске «Аграрлық несие корпорациясы» АҚ-ы 88,4 млрд теңге бөлуді жоспарлап отыр. Оның ішінде бюджеттік несие 70 млрд теңге, қалғаны өз қаражаты. Сонымен қатар, 2021 жылдың желтоқсан айында ағымдағы жылдың егіс жұмыстарына дайындалу үшін 5,1 млрд теңге сомасында несие бөлінді. Көктемгі егіс жұмыстарына жоспарланған кредит шығын нормативтерін арттыруды ескере отырып, 3 мыңға жуық ауыл шаруашылығы тауарын өндірушіні және 4 млн гектарға жуық егістікті қамтуға мүмкіндік береді.

2021 жылы көктемгі егіс және егін жинау жұмыстарына Аграрлық несие корпорациясы 83,8 млрд. теңге сомасына (оның ішінде бюджеттік кредит 70 млрд. теңге) 3 мыңнан астам ауыл шаруашылығы тауарын өндірушіні несиелендіріп, бұл 4,3 млн. гектарды қамтуға мүмкіндік берді.

Биыл сондай-ақ, бұған дейін хабарлағанындай, ауыл шаруашылығы өнімдерін форвардтық сатып алуға 80 млрд теңге бөлінеді. Қазіргі таңда 40 млрд теңгеден астам сомаға өтінім келіп түскен.