Қазақстанда тері өңдеу зауыты салынады
Iskefe һolding компаниясы Алматыда ірі қара малдың терісін өңдеу зауытын салуға 27 млн. доллар инвестиция салады.
Бұл меморандумға ҚР Ауыл шаруашылығы министрі Ербол Қарашөкеевтің Түркияға жасаған сапары барысында қол қойды.
Алматыда индустриялық аймағында биыл басталып, 2023 жылы іске қосылатын желатин өндіру зауытының жоспарланған инвестициясының көлемі 27 млн. доллар. 100-ден астам жаңа жұмыс орнымен қамтамасыз ететін кәсіпорын шикізат ретінде ірі қара мал терісі пайдаланылатын болады. Оның өндіріс қуаты жылына 7 мың тонна желатинді құрайды. Оған шамамен 38 мың тоннаға жуық шикізат қажет.
Қазіргі таңда елімізде теріні бастапқы өңдеу бойынша 9 кәсіпорын жұмыс істейді. Бірақ, өңдеуші кәсіпорындар ауыл шаруашылығы тауарын өндірушілерге ірі қара малдың өңделмеген терілерін сатып алу үшін бәсекеге қабілетті баға ұсына алмауда. Ұсақ және жеке қосалқы шаруашылықтар жануарлардың терісін қоқысқа тастайды.
Iskefe һolding компаниясы құрылымына теріні өңдейтін, желатин, протеин, гидролизат, жануарлардан алынатын сұйық аминқышқылдарын өндіретін 7 зауыт, сондай-ақ ғылыми-зерттеу орталығы мен сынақ зертханалары кіреді. Бүгінгі күні ол былғары саласындағы интеграцияланған ірі өндіруші болып саналады. Оның үлесіне Еуропа мен Азиядағы өткізу нарықтары мен сиыр желатиніне әлемдік қажеттіліктің 6 пайызы тиесілі.