Жер мәселелері бойынша тұрақты жұмыс істейтін консультативтік-кеңесші орган құрылады

Ауыл шаруашылығы министрлігі Жер ресурстарын басқару комитеті жанынан жер мәселелері бойынша тұрақты жұмыс істейтін консультативтік-кеңесші орган құру туралы шешім қабылдағанын жариялады. Оның құрамына ҚР Парламент депутаттары, қоғамдық пікір көшбасшылары, ауыл шаруашылығы, құрылыс, жеке тұрғын үйлер құрылысы, өнеркәсіп және басқа да салалардағы жер мәселелерін көтеріп жүрген белсенді азаматтар кіретін болады.

Консультативтік-кеңесші орган жер қатынастары саласын реформалау бойынша қажетті өзгерістерді талқылау және қабылдау алаңына айналады деп жоспарланып отыр. Министр Ербол Қарашөкеевтің тапсырмасы бойынша енді Жер ресурстарын басқару комитеті осы органды құру үшін қысқа мерзімде барлық қажетті іс-шараларды жүргізуге тиіс.

Жалпы жер заңнамасын жетілдіру жөніндегі заңға Мемлекет басшысы Қасым-Жомарт Тоқаев 30 маусымда қол қойған болатын. Жер ресурстарын тұрақты басқаруға бағытталған өзгерістер нәтижелі болу үшін Жер ресурстарын басқару комитеті жанынан жаңадан құрылатын жер мәселелері бойынша тұрақты жұмыс істейтін консультативтік-кеңесші органға артылар жүк жеңіл болмауы керек. Бұл сенімді ол қаншалықты ақтайтынын енді уақыт өзі көрсететін болады.

Е.Кебекбай, журналист.