Қазақстан Ауғанстандағы теміржол құрылысына қатысады

Қазақстанның Cауда және интеграция министрлігі мен Ауғанстанның қоғамдық жұмыстар министрлігі ҚР-ның Тургунди – Герат – Кандагар-Спин-Болдак темір жолының құрылысына қатысуға мүдделілігін бекітетін ниеттер туралы хаттамаға қол қойды. Бұдан әрі көлік және логистика саласындағы ынтымақтастық туралы келісім жасалатын болады, оның шеңберінде Тургунди – Герат учаскесінде теміржол желісін, қажетті инфрақұрылымды, сондай-ақ Герат қаласындағы көлік-логистикалық орталықты салудың басталуы айқындалатын болады. Бұл туралы Қазақстан үкіметінің баспасөз қызметі хабарлады.

Хаттамаға қол қою вице-премьер – ұлттық экономика министрі Серік Жұманғарин бастаған қазақстандық делегацияның Ауғанстанға сапары аясында өтті.

«Жоба өңірлік транзиттік өзара байланысты кеңейту, Орталық және Оңтүстік Азия арасындағы көлік-логистикалық байланыстарды нығайту, Үнді мұхитының порттарына қолжетімділікті қамтамасыз ету тұрғысынан Қазақстан үшін ерекше маңызға ие. Жаңа теміржол желісі Ауғанстан аумағы арқылы өтетін және оңтүстік бағытта жүк тасымалдау үшін ең қысқа бағытты қамтамасыз ететін болашақ трансұлттық дәліздің негізгі буыны болады», - деп баспасөз қызметі хабарлады.

Сондай-ақ қол қойылған хаттама АХҚО юрисдикциясында Қазақстан, Ауғанстан және Түрікменстан темір жолдары арасында бірлескен кәсіпорын құру мүмкіндігін пысықтауды көздейді.

Теміржол желісінің құрылысымен бір мезгілде оның бойында талшықты-оптикалық кабель төсеу көзделеді. Бұл көлік дәлізі бойындағы цифрлық инфрақұрылымды дамытуды, коммуникацияларды жақсартуды, пойыздар қозғалысының қауіпсіздігін, оның ішінде оларды бақылауды қамтамасыз етеді және елді мекендерді келешекте жоғары жылдамдықты интернетке қосу мүмкіндігін ашады.

Серік Жұманғарин Ауғанстанның азаматтық авиация және көлік министрі Хамидулла Ахундзадамен де кездесу өткізді. Тараптар елдер арасында тікелей әуе рейстерін ашу келешектерін талқылады.

Источник: ElDala.kz