2021 жылы өсімдіктер карантині саласында 6 мыңнан астам заңбұзушылық анықталды

Карантинге жатқызылған өнімдердің көбі былтыр Ресей, Қытай, Қырғызстан, Өзбекстан, Түркия, Түркіменстан, Әзірбайжан, Ауғанстан, Иран, Тәжікстаннан, Вьетнам, Германия, Нидерланды, Франция, Польша сияқты елдерден әкелінді. Агроөнеркәсіптік кешендегі мемлекеттік инспекция комитетінің аумақтық бөлімшелері былтыр өсімдіктер карантині саласында 6 140 бұзушылықты анықтап, 455,2 млн теңгеден астам сомаға әкімшілік айыппұл салған. Басқа елдерден карантинге жатқызылған өнімді импорттау кезінде карантиндік фитосанитариялық бақылауды жүзеге асыру кезінде фитосанитариялық сертификаттың болмауының 3 250 жағдайын, карантиндік объектілерді анықтаудың 189 фактісін, карантинге жатқызылған өнімді межелі пунктте қайталама тексеруге ұсынбаудың 577 жағдайын, фитосанитариялық сертификаттың сәйкес келмеуінің 218 жағдайын, таңбалаудың болмауының 113 жағдайда, қол жүгіне тыйым салудың 5 жағдайын, карантинге жатқызылған өнімді жүру жолында басқа мекенжайға жіберудің 28 жағдайын, фитосанитариялық талаптарды бұзудың 72 жағдайын және тыйым салынған өнімді әкелудің 3 жағдайын тіркеді.

ҚР Ауыл шаруашылығы министрлігінің мәліметіне қарағанда, импорттаушы елдерге барлығы 21,3 мың тонна, 1 104 текше метр және 44 827 дана карантинге жатқызылған өнім қайтарылды. Карантинге жатқызылған өнімді қайтаруды, жоюды және қайта өңдеуді жүзеге асыру бойынша 862 шара қабылданды.

Е.Ержанұлы, журналист