Қазақша
  • Қазақша
  • Русский

2023 жылы ауыл шаруашылығын дамытуға 11 мың шағын несие беріледі

Агроөнеркәсіп кешеніндегі инвестициялық жобалар 6 мыңнан астам жұмыс орнын ашуға мүмкіндік береді. Бұл туралы ҚР Премьер-Министрі Әлихан Смайылов айтты.

«Аграрлық секторда инвестициялық жобалар жүзеге асырылуда. Агроөнеркәсіп кешеніндегі инвестициялық жобаларды іске асырудың 2022-2026 жылдарға арналған Жол картасы бекітілді. Жалпы құны 2,8 трлн теңге болатын 967 инвестициялық жобаны пайдалануға беру жоспарлануда. Биыл 6,6 мың жұмыс орнын құрумен 536 млрд теңгенің 291 жобасын жүзеге асыру жоспарлануда. Ауыл шаруашылығы кооперациясын қалыптастыру арқылы ауыл халқының табысын арттыру мақсатында Жамбыл облысының пилоттық жобасы кеңейтілуде», - деп жазды Әлихан Смайылов депутаттық сауалға берген жауабында.

Оның айтуынша, жобада адвокат арқылы сыйақы мөлшерлемесі 2,5%-дан аспайтын, максималды мерзімі 7 жылға дейінгі шағын несиелер беру қарастырылған.

«2023 жылға арналған ауыл халқының табысын арттыру жобасын жүзеге асыру үшін 11 мың шағын несие беру жоспарында 52,4 млрд теңге қаражат қарастырылған. Алдағы уақытта бұл іс-шараға жеке қосалқы шаруашылықтардың көпшілігін кооперативтік кәсіпкерлікке тарта отырып, оларға ауыл шаруашылығы техникасын лизингке алу, шағын несиелер алу және сату нарықтарына шығу үшін жеңілдікті шарттарды қамтамасыз ету арқылы 1 триллион теңгеге дейін қаражат бөлу жоспарлануда. Нәтижесінде 350 мыңға жуық  ауыл шаруашылығында сапалы жұмыс орындары ашылады», - деп қосты Премьер-Министр.