7 жылда АӨК саласында 400 мың жұмыс орны құрылмақ

Тұжырымдаманың негізгі міндеттері: салада еңбек өнімділігін 2 есеге, ауыл шаруашылығы өнімдерінің экспортын 3 есеге ұлғайтып,  барлық азық-түлік тауарлары бойынша өзін-өзі қамтамасыз етуді кемінде 90 пайызға жеткізу. Сондай-ақ ауыл шаруашылығының негізгі капиталына тартылған инвестиция көлемін орта есеппен 2,5 есеге арттыру.

Ауыл шаруашылығы министрі Ербол Қарашөкеевтың айтуынша, мал шаруашылығында селекцияның заманауи әдістерін енгізуге, жемшөп өндірісін ынталандыруға, жайылым инфрақұрылымын дамытуға және жалпы ауыл шаруашылығы жануарларының санын көбейтуге баса назар аударылады. Отандық өнім экспортының көлемін арттыру мақсатында шетелдік жеткізушілер тізілімдерінде қазақстандық кәсіпорындардың тізбесін кеңейту бойынша жұмыс жүргізіледі. Бұл экспортты 9,9 млрд долларға дейін ұлғайтуға мүмкіндік береді. Жалпы, 2030 жылға дейін ауыл шаруашылығының барлық салаларында жалпы құны 4,5 трлн теңгені құрайтын 1,7 мыңнан астам инвестициялық жобаны іске асыру көзделген.

 – Аграрлық ғылымды бағдарламалық-мақсатты қаржыландыруды жыл сайын ұлғайту, жас ғалымдар үшін салалық гранттық қаржыландыруды енгізу көзделіп отыр. Нәтижесінде АӨК-те енгізілген ғылыми әзірлемелердің үлесі 14,5%-дан 40%-ға дейін ұлғаюы тиіс, – дейді министр Ербол Қарашөкеев.

Жалпы, бұл тұжырымдама  70 мыңға жуық шаруашылық пен шамамен 400 мың жұмыс орнын құруға мүмкіндік береді деп жоспарлануда.

         Е.КЕБЕКБАЙ