Ақсуда картоп қытырлақтарын шығаратын зауыт ашылады
Бұл істі жергілікті компаниялардың бірі қолға алады деп жоспарланған. Кәсіпорын іске қосылса, жылына 20 мың тоннаға дейін картоп қытырлақтарын шығаруға болады.
Ақсу қаласында жылына 20 мың тонна картоп қытырлағын шығаратын зауыт ашу жоспарланып отыр.
«Бұл жобаны «Chips Asia» ЖШС жүзеге асырады. Зауыт 2025 жылы тапсырылуы керек. Қазіргі күні жер телімі ресімделген, техникалық шарттарды алу бойынша жұмыстар жүргізіліп жатыр. «Ақтоғай-Агро» ЖШС былтыр эксперимент ретінде қытырлақтар өндіруге арналған картоптың «Фонтане» сортын 500 гектарға егіп, 9 мың тоннадай өнім жинады. «Ақтоғай-Агро» - «Chips Asia» компаниясы құрылтайшыларының бірі»,-деп атап өтті өңірлік ауыл шаруашылығы басқармасы басшысының орынбасары Сәуле Шүкірова.
Биыл Ертіс-Баян өңірінде жалпы құны 50 млрд теңгеден асатын 35 инвестициялық жоба жүзеге асып жатыр. Жыл соңына дейін 5,1 мың бас сиырға арналған тауарлы сүт фермасы, 90 мың тонна өнім сыятын 10 көкөніс сақтау қоймасы ашылады деп жоспарланған. Бұдан бөлек алдағы жылдары Шарбақты ауданы мен Ақсу қаласында күнбағыс майын өңдейтін кәсіпорындар ашылады деп күтіліп отыр.
Еске сала кетейік, бұған дейін Ресейдің арзан сүті павлодарлық фермерлерді шығынға ұшыратқалы тұрғаны жайында жазған едік.