Ақтөбе облысында ірі қарадан жұқпалы ауру анықталған қожалыққа шектеу енгізіледі
Ақтөбе облысы Алға ауданына қарасты Маржанбұлақ ауылындағы шаруа қожалығында ірі қарадан қарасан ауруы анықталды.
«Алға ауданының Маржанбұлақ ауылдық округінің «Сарым» шаруа қожалығындағы ірі қара малдардың арасында қарасан жұқпалы ауруының анықталуына байланысты шектеу іс-шаралары белгіленсін», - делінген Маржанбұлақ округінің әкімі Мейіржан Асқарұлының шешім-жобасында.
Мәлім болғандай, 9 маусым күні аталған қожалықтағы 1,5 жасар ірі қараның өлексесін зерттеу нәтижесінде одан қарасан анықталған.
«Маржанбұлақ ауылдық округінің «Сарым» шаруа қожалығындағы ірі қара малдың арасында 1 бас еркек төлдің өлексесі бойынша қарасан ауруына күдік келтіріліп, одан сынама алынып, облыстық ветеринария зертханасына жіберілді. Оның қорытындысына сай, ірі қарадан алынған сынама қарасан ауруына оң нәтиже көрсетті. Қарасанның қауіпті бактериологиялық жұқпалы ауру екенін ескере отырып, Маржанбұлақ ауылдық округінің «Сарым» қожалығының аумағына шектеу іс-шараларын енгізуді ұсынамыз», - делінген шешімшге қосымша берілген түсіндірмеді.
Құжат 26 маусымға дейін көпшілік талқылауда болады.