Агробанк құру бастамасынан тайынбаймыз – «Ауыл» партиясы төрағасы

Агробанк құрылса, шаруаларға төмен пайызбен несие бере алар еді. Бұл туралы «Jibek Joly» телеарнасының «Уәде» бағдарламасына сұхбат берген «Ауыл» ХДПП Төрағасы, ҚР Парламенті Мәжілісінің депутаты, фракция жетекшісі Серік Егізбаев мәлім етті, деп хабарлайды Kazinform. 

Атап айтқанда, «Ауыл» партиясының сайлауалды бағдарламасында 100% мемлекеттік жарғылық капиталмен Агробанк құруға ұмтылатыны жазылған.

«Үкіметке Агробанк құру жөнінде талап қойып отырмыз, бірнеше депутаттық сауал жолдадық. Жақында Мәжілісте өткен дөңгелек үстел отырысында осы мәселені тағы да талқыладық. Осыған қазір Үкімет те, Ұлттық банкте қарсылық білдіріп отыр. Бірақ өз бастамамыздан тайынбаймыз», - деді С. Егізбаев.

Бұл тұрғыда ол партия өкілдері осы мәселемен белсенді айналысып жатқанын, сондай-ақ қазір Агробанк құру бастамасына Парламент депутаттарының көбісі қолдап отырғанын айтты. Себебі Агробанк шаруаларға төмен пайызбен несие бере алар еді.

«Сонымен қатар бізде «Азық-түлік қауіпсіздігі туралы» заң жоқ. Заң жобасын әзірлеп, тиісті сараптамадан өткізіп, оны Парламентке енгізуге дайындап отырмыз», - деді Ауыл» ХДПП төрағасы.

Бұдан бұрын хабарланғандай, биыл күзде Мәжілістегі «Ауыл» партиясы фракциясының өкілі, депутат Жигули Дайрабаев Қазақстандағы фермерлерге Агробанк банкін құрып беру керек екенін айтты.

«Аграрлық несие корпорациясы», «ҚазАгроҚаржы» және тағы басқа қаржы институттарының басын біріктіріп, мемлекеттен жыл сайын бөлініп жатқан қаржыны бір жерге топтастырып, мемлекеттің қатысуымен Агробанк ашуды ұсынамыз», - деді Ж.Дайрабаев.