Қалай субсидия аламын?

«Даму» Қоры – шағын және орта кәсіпкерлікті дамытуға арналған мемлекеттік бағдарламалардың операторы. Яғни, үкімет бекіткен бағдарламаны жүзеге асырушы. Ол бағдарламаның нақты шарттары бар. Қор сол шарт аясында кәсіпкерге үш құрал бойынша қолдау көрсетеді. Бүгінгі постқа арқау болатын құрал – субсидия.

Даму Қорының субсидиясы кей азаматтар ойлағандай – қолға беріліп, елге таратылатын ақша емес. Қордың субсидиясын алу үшін:

Бірінші – кәсіпкер болу шарт. Яғни, жеке кәсіпкер, шаруа қожалығы немесе серіктестік ретінде тіркеліп, жұмыс істеп, салық төлеп отырған, айналымы бар бизнес өкілі болу керек.

Екіншіден – сол бизнесті дамытуға, кеңейтуге деп банктен несие алса - Қор сол несиенің пайызының біраз бөлігін арзандатады.

Мысалы: «Ұлттық жоба аясында» 14 пайызбен несие алса - оның 8 пайызын, «Қарапайым заттар экономикасы» бағдарламасы аясында 15 пайызбен несие алса Қор оның 9 пайызын субсидиялап, кәсіпкер қарызын тек 6 пайызбен төлейтін етіп жүгін жеңілдетеді.

«Даму» Қоры арқылы кәсіпкерлерге берілетін субсидия деген – осы.

Ал бұлай субсидияланатын несие алу үшін кәсіпкердің құжаттары түгел, дұрыс, бизнесінің бағыты аталған бағдарламаға сай келуі тиіс. Субсидияға өтінім берудің қысқаша алгоритмі:

▪ Кәсіпкер Банк/Лизинг компанияға қаржы сұрап өтінім жазады.
▪ Банк/Лизинг компания кәсіпкердің жобасының қаржы-экономикалық тиімділігін талдап, тексеріп, сараптайды. Несие берер болса Банк кәсіпкерге хат арқылы жауап береді.
▪ Кәсіпкер «Даму» Қорына тиісті құжаттарды жинап сауалнама-өтінім толтырып береді. «Даму» Қоры жобаның салалық бағытына қарай екшейді.
▪ Құжаттар толық болған жағдайда қаржы ұйымы/кәсіпкер/«Даму» арасында субсидиялау жөніндегі үшжақты шарт жасалады.