Алматыда азық-түлік тауарлары жеңілдетілген бағамен сатылуда

    2022 жылдың мамырына дейін 2,5 млрд теңгеге «Магнум» сауда желісінде 10 мың тонна картоп, 4,2 мың тонна сәбіз, 4,7 мың тонна пияз, 3 мың тонна қырыққабат сатылады. Қазіргі уақытта сөрелердегі бағалар: картопқа – 102 теңге, сәбізге – 114 теңге, пиязға – 92 теңге, қырыққабатқа – 91 теңгені құрап отыр. Сондай-ақ «Magnum Cash & Carry» сауда желісінің 54 филиалында әлеуметтік маңызы бар азық-түлік тауарлардың 12 атауы (1-сұрыпты ұн, қарақұмық, күріш, макарон, күнбағыс және сары май, тауық еті, сиыр еті, сүт, айран, сүзбе, қант) 2021 жылдың соңына дейін тіркелген, төмендетілген бағамен сатылады. «Тоймарт» сауда желісі олардың 10 түрін (1-сұрыпты ұн, формалы нан, күріш, рожки, күнбағыс және сары май, тауық еті, айран, сүзбе, тұз) 1 қарашадан 2022 жылғы 30 сәуірге дейін төмендетілген бөлшек бағамен сатады.

    Алматы қаласының кәсіпкерлік және инвестициялар басқармасының баспасөз қызметінің хабарлауынша, желтоқсанға дейін қарыз есебінен берілген «Ақсай «ХБК» ЖШС-да нанның сатылу бағасы 75 тг деңгейінде тіркеледі. Оған «Ақсайнан» зауытының жеткізілімдерімен барлық сауда желілері, 3 мыңнан астам «үй жанындағы дүкендері» және азық-түлік базарлары (дистрибьюторлар арқылы) қамтылған. Ал «Asyl Meat» ЖШС өндіруші 2022 жылғы 1 маусымға дейін 2050 тг/кг белгіленген баға бойынша 6 фирмалық дүкенде 90,4 тонна сиыр етін (жауырын-төс бөлігі) сатады. Ал 2024 жылдың ақпан айына дейін қаланың сауда объектілеріне 1 санаттағы 49,6 млн. дана жұмыртқаны (бекітілген сатылу бағасы – 400 тг/10 дана) жеткізуге «Алсад Қазақстан» ЖШС-не қарыз берілді. Қазіргі уақытта «Магнум» сауда желісінің барлық 54 дүкеніне және «Small» желісінің 19 дүкеніне жеткізу жүргізіліп жатыр. Сөредегі бекітілген баға 440 тг/10 дана.

    Қазіріг таңда Алматы қаласының әкімдігі Павлодар облысының тауар өндірушілермен келіссөздер жүргізіп жатыр. Алдын ала деректер бойынша, 6 мың тоннадан астам картопты сатып алу құны 150 тг/кг жеткізу қарастырылып отыр. Картоп жеңілдетілген бағамен «Small» және «Тоймарт» сауда желілерінде, сондай-ақ қаланың әлеуметтік дүкендерінде сатылады. Бұған дейін Алматы және Жамбыл облыстарынан 1,5 мың тонна пияз жеткізуді ұйымдастырып, оның жоғарыда аыт аталған сауда желілеріндегі бағасы 69-74 тг/кг құраған болатын.

Ерлік Кебекбай