Қарағанды облысында қыста малға шамамен 2 млн тонна шөп қажет

Қыс мезгілінде Қарағанды облысына 1,9 млн тонна шөп қажет болады. Бұл туралы Қарағанды облысының әкімі Ермағанбет Бөлекпаев мәлімдеді.

Алдын ала есептеулер бойынша Қарағанды облысында 450 мыңнан астам ірі қара мал, 696 мың бас қой және 311,6 мың бас жылқы бар. Қысқы кезеңде барлық малды ұстауға шамамен 1,9 млн тонна шөп қажет. Өткен жылы қажетті қор 1,7 млн тоннаны құрады.

— Биыл өңірде 1,9 млн тоннадан астам шөп бар. Сонымен қатар бүгінгі таңда 250 мың тоннадан астам сабан дайындалды. Жем-шөп дайындау үшін шаруаларға литріне 250 теңге бағамен 3 мың тоннадан астам арзандатылған дизель отыны бөлінді, — деді өңір басшысы.

Жеке қосалқы шаруашылықтар өз малдарына шөп дайындай алуы үшін мемлекеттік және орман қорының жерлері бөлінді. Облыстың 3 орман шаруашылығының жалпы ауданы 21 мың га мемлекеттік орман қорын құрайды, оның ішінде 2 мың га шабындық және 19 мың га жайылым.

— Бұдан басқа, ауыл шаруашылығы тауарын өндірушілерді мемлекеттік қолдау шеңберінде ірі және ұсақ малдың аналық басының жем-шөп құнын арзандатуға 1,5 млрд. теңге сомасына субсидиялар төленді, — деп толықтырды сөзін Қарағанды облысының әкімі.