АШМ Ислам қаржыландыру құралдарын зерттеп, практиканы жандандыруға ниетті
Ислам қаржыландыру нарығына шығу және оны зерделеу отандық ауыл шаруашылығы саласына қосымша қаржы көздерін тартуда басымдыққа ие. Бұл туралы Ауыл шаруашылығы министрі Ербол Қарашөкеев мәлім етті.
«Ауыл шаруашылығы саласын қаржы ресурстарымен қамтуда мемлекеттік қолдау қажет. Сала әлеуетін арттыра түсу үшін тікелей шетелдік инвестициялардың рөлі зор. Осы орайда, жеке қаржы ағындарын, отандық және халықаралық капитал нарығын тартып, жұмылдыру керек. Бүгінде Ислам қаржыландыру нарығына деген қызығушылық тенденциясы үнемі өсіп келеді. Бұл тек мұсылман елдері арасында ғана емес», - деді Ербол Қарашөкеев Ислам азық-түлік қауіпсіздігі ұйымының ұйымдастыруымен Сыртқы министрлігінде өткен семинарда.
Сондай-ақ, ведомство басшысы министрлік Ислам азық-түлік қауіпсіздігі ұйымының барлық маңызды бастамаларына қолдау көрсетуге дайын екендігін жеткізді.
«Қазақстан үшін Ислам қаржыландыру нарығына шығу – ауыл шаруашылығы саласына қаржы тартуда қосымша перспектива. Осыған байланысты Қазақстанда Ислам қаржыландыру құралдарын зерттеу және практиканы жандандыру қажет. Оның ішінде Сукук капиталын тарту және инвестициялық қызметті қаржыландыру маңызды құралы да бар», - дейді ол.
Бұған дейін Е. Қарашөкеев ауыл шаруашылығы саласына тартылатын инвестиция 3,2 трлн теңгеге дейін жететінін айтқан еді.