Ауыл кәсіпкерлері 6%-бен 5 жылға дейінгі мерзімге несие ала алады

«Ауыл шаруашылығын қаржылай қолдау қоры» АҚ-ы БҰҰ Даму бағдарламасымен бірлесіп «Эко-Даму» несиелеу бағдарламасының екінші кезеңін іске асыруды бастады. Ол  12 облыстағы  ерекше қорғалатын 28 табиғи аумаққа жақын орналасқан 771 ауылды қамтиды. Экотуризм, орман, балық, аңшылық, құс,  қоян, ара шаруашылықтары мен жайылымдық жерлерді пайдалану сияқты экологиялық таза кәсіпкерлік түрлерін қолдауға бағытталған бұл бағдарламаның бюджеті 288 млн теңге.  Ауыл кәсіпкерлері өз бизнес-жобаларына  6%-бен 5 жылға дейінгі мерзімге несие ала алады. Несиенің жылдық тиімді сыйақы мөлшерлемесі 6,7%-дан аспайды. Несие көлемі ҚР Ұлттық банкі белгілеген 100 АЕК-тен 5400 АЕК-ке дейінгі мөлшерде болмақ. Бағдарламаға қатысуға өтінім беру үшін қажетті  ақпаратты www.fagri.kz сайтанынан алып,  Ауыл шаруашылығын қаржылай қолдау қорының облыстардағы филиалына бару керек.

         Қордың баспасөз қызметінің мәліметіне қарағанда, «Эко-даму»  бағдарламасы БҰҰ Даму бағдарламасының Қазақстандағы өкілдігі,   ҚР Экология, геология және табиғи ресурстар министрлігінің Орман шаруашылығы және жануарлар дүниесі комитеті және Ауыл шаруашылығын қаржылай қолдау қоры қол қойған келісім нәтижесінде жасалған болатын. Оның бірінші кезеңі 2014-2015 жылдары жүзеге асырылды.

«Бұл ауыл шаруашылығын қаржылай қолдау қоры мен БҰҰ Даму бағдарламасы арасындағы алғашқы келісім емес. 2008-2013 жылдары «Табиғи орта» бірлескен жобасы іске асырылды. Оның аясында ерекше қорғалатын табиғи аумақтарға жақын орналасқан ауылдардың 154 тұрғыны жалпы сомасы 221,4 миллион теңгенің шағын несиесін алды. 2008 жылдан бері  561,6 млн теңгенің 221 жобасы қаржыландырылды. Оның 216,6 млн теңгесі қордың қаражаты. Мұндай бағдарламалар ауыл тұрғындарына қоршаған ортаны сақтай отырып, микробизнес ашуға және дамытуға, жаңа жұмыс орындарын құруға мүмкіндік береді», – дейді  «Ауыл шаруашылығын қаржылай қолдау қоры» АҚ басқарма төрағасы Жандар Омаров. Оның айтуынша, «Эко-даму» бағдарламасының негізгі бағыттарының бірі тең экономикалық мүмкіндіктерді қамтамасыз ете отырып, гендерлік теңдікті сақтау. Сондықтан, бұл бағдарламада әйелдерге басымдық беріледі.

         Ауыл шаруашылығын қаржылай қолдау қоры баспасөз қызмеітінің материалы бойынша әзірлеген Ерлік Ержанұлы