Қазақша
  • Қазақша
  • Русский

Ауыл шаруашылығы проблемалары бойынша жедел штаб құрылды

Ауыл шаруашылығы тауарларын өндірушілерден 123,6 млрд теңгеге 3,4 мыңға жуық өтінім қабылданды. Бұл туралы Ауыл шаруашылығы министрі Ербол Қарашөкеев мәлім етті.

«Биыл көктемгі егіс жұмыстарына 140 млрд теңге бөлінеді. Аграрлық несие корпорациясы қаражаттың бөлінуін күтпей-ақ, қолда бар ресурстар есебінен былтыр желтоқсаннан бастап қаржыландыруды бастады. Мәселен, желтоқсанда 794 ауыл шаруашылығы тауарын өндірушіге 22,6 млрд теңге бөлінді. Ал, биыл қаңтардан бері 564 ауыл шаруашылығы тауарын өндіруші 17,1 млрд теңгеге қаржыландырылды», - деді Ербол Қарашөкеев Үкімет үйінде.

Министрдің баяндауынша, биылғы жоспар 3 200-ден астам ауыл шаруашылығы тауарын өндірушіні 2 миллион гектардан астам егіс алқабымен қамтамасыз ету.

«Бүгінде ауыл шаруашылығы тауарын өндірушілерден 123,6 млрд теңгеге 3,4 мыңға жуық өтінім қабылданды. Оның ішінде 71,7 млрд теңгеден астам сомаға 1 669 өтінім мақұлданды. Қаржыландыру азық-түлік келісімшарт корпорациясы арқылы да жалғасады. Биыл корпорация салаға 55 млрд теңге бөледі. Оның 20 млрд теңгесі форвардтық сатып алу бағдарламасы бойынша және 35 млрд теңгесі тауарлық несие беру есебінен», - дейді ол.

Сонымен қатар, Е. Қарашөкеев проблемалық мәселелерді жедел шешу үшін министрлік жанынан құзырлы мемлекеттік органдар және өңірлік әкімдік өкілдерінен құралған жедел штаб құрылғанын айтты.