Ауыл шаруашылығы саласында енді субсидиялау қағидалары өзгермейді

Шілденің 25-нен бастап ауыл шаруашлығы саласындағы субсидиялау қағидаларына өзгеріс енгізілді. Бұған дейін сыйақы мөлшерлемелерін субсидиялау тетігі ауыл шаруашылығы техникасын, жабдықтар мен ауыл шаруашылығы жануарларын сатып алуға, негізгі құралдарды сатып алуға, құрылысқа арналған қарыздар бойынша сыйақы мөлшерлемесін 10%, айналым қаражатын толықтыру бойынша 7%, көктемгі егіс және егін жинау жұмыстарын жүргізуге 9% төмендетуді көздеген еді. Бұл ретте субсидиялау жылдық 17% аспайтын номиналды сыйақы мөлшерлемесі бар кредиттер бойынша жүзеге асырылған болатын. Енді қағидалардың жаңа редакциясына сәйкес, субсидиялау ҚР Ұлттық банкінің базалық мөлшерлемесі мен жылдық 7,5 % теңгемен жиынтық көрінісі ретінде есептелген номиналды сыйақы мөлшерлемесінен аспайтын мөлшерлемеде жүзеге асырылады. Мәселен,  егер қарыз шартын жасасу кезінде ҚР Ұлттық банкінің базалық мөлшерлемесі жылдық 14% құраса, бұл жағдайда субсидиялауға жататын номиналды сыйақы мөлшерлемесі 21,5 %-дан аспауы тиіс.  Қарыз алушы номиналды сыйақы мөлшерлемесінің 6%  төлейді, Ұлттық банктің базалық мөлшерлемесі мен 7,5% жылдық пайыздық жиынтық сомасы мен қарыз алушының теңгемен төлеген 6% арасындағы айырманың нәтижесінде алынған номиналды сыйақы мөлшерлемесінің қалған бөлігі мемлекеттік бюджеттен субсидияланады. Яғни сыйақының номиналды мөлшерлемесі 21,5% болған кезде агороөнеркәсіп кешені субъектісі 6% төлейді, мемлекет 15,5% субсидиялайды.

Министрліктің хабарлауынша, субсидиялауға мынадай бағыттар жатады:

·        ауыл шаруашылығы техникасын, оның ішінде аспалы және тіркемелі жабдықтарды сатып алуға, сондай-ақ ауыл шаруашылығы жануарларын сатып алуға, негізгі құралдарды сатып алуға, құрылыс салуға (ұн, минералдық сулар және алкогольсіз сусындар өндіруге арналған негізгі құралдарды сатып алуға арналған қарыздарды қоспағанда) арналған;

·        өндірістік процестің технологиялық циклі үшін қажетті айналым қаражатын толықтыруға арналған;

·        көктемгі егіс және егін жинау жұмыстарын жүргізуге арналған.

Осылайша, осы бағдарлама шеңберінде қолдау шарттары қаржы нарығындағы өзгерістерге жедел ден қою мақсатында ҚР Ұлттық банкінің базалық мөлшерлемесін ескере отырып қайта қаралды және бұл субсидиялау қағидаларына жиі өзгерістер енгізу қажеттілігін жояды.

Ауыл шаруашылығы министрлігі материалы бойынша әзірлеген Е.Кебекбай