Ауыл шаруашылығы саласындағы 12 мыңнан астам жоба қаржыландырылады

     Ауыл шаруашылығын қаржылай қолдау қоры беретін несие көлемі былтырғы   деңгейде сақталады. Атап айтқанда шағын кәсіпкерлік саласындағы 12 мыңнан астам жобаны қаржыландыруға 63 млрд теңгенің шағын несиесін беру жоспарланып отыр. Оның басым бөлігі «Еңбек» нәтижелі жұмыспен қамтуды және жаппай кәсіпкерлікті дамыту бағдарламасына тиесілі. Несие қаржысының жартысынан астамы ісін жаңа бастаған кәсіпкерлердің жобалары мен стартап-жобаларға беріледі.

           Жалпы бұл бағдарламаға ауыл шаруашылығы бағытындағы және ауыл шаруашылығына жатпайтын бизнесті ашатын немесе жұмыс істеп тұрған бизнесін кеңейткісі келетін кәсіпкерлер қатыса алады. Оның аясында мал мен  өсімдік шаруашылықтарын және  ауыл кәсіпкерлігін дамыту, ауыл шаруашылығы өнімдерін қайта өңдеу және сақтау сияқты жобалар қаржыландырылады. Бағдарлама арқылы  кәсіпкерлер 6,5 жылға дейінгі мерзімге 4-тен12 млн теңгеге дейін шағын несие ала алады. Сондай-ақ 16 млн теңгеге дейінгі несие қалаларда жүзеге асырылатын жобаларға да беріледі. Ал оның көлемі Нұр-Сұлтан, Алматы, Шымкент, Ақтау, Атырау қалаларында – 20 млн теңгеге дейін жетеді. Сыйақы мөлшерлемесінің көлемі – жылына 6%, бұл ретте тиімді жылдық сыйақы мөлшерлемесі 6,7% аспайды. Айта кетер тағы бір жәйт көпбалалы және аз қамтылған отбасы мүшелеріне несиелер жылына 4% беріледі, ал тиімді сыйқаы мөлшерлемесі 4,7% аспайды. Толық ақпаратты қордың облыстық филиалдарынан немесе  www.fagri.kz сайты мен  әлеуметтік желідегі ресми аккаунттардан табуға болады.

Қордың баспасөз қызметінің материалы бойынша дайындаған Ерлік ЕРЖАНҰЛЫ