Ауылшаруашылық жерлерін меншіктенуге шектеулер белгіленді
Үкімет жер пайдалану құқығындағы ауыл шаруашылығы мақсатындағы жер телімдерінің шекті мөлшерін бекітетін қаулы жобасын мақұлдады.
«Республика бойынша орта есеппен табиғи-климаттық жағдайларға байланысты шаруалар мен фермер қожалықтары үшін ауыл шаруашылығы жерлерінің шекті (ең жоғары) көлемі 35 мың гектар, заңды тұлғалар үшін 51 мың гектар болып белгіленді. Бұл ретте аталған норма енгізілгенге дейін берілген жерлерге тиісті сараптама жүргізілуде», - деді Ауыл шаруашылығы вице-министрі Әбілқайыр Тамабек.
Сондай-ақ ол өткен жылы жер пайдаланушыларға жүргізілген тексерулер саны 9 есеге, ал тексерілетін аумақтар 21 есеге артқанын еске салды. Соның нәтижесінде қазірдің өзінде пайдаланылмай жатқан 1,8 миллион гектарға жуық жерді игеру басталды.
Тұрғындардың малына жайылым тапшылығын шешу шаралары қолға алынуда.
Жер телімдерін жедел және ашық бөлуді қамтамасыз ету үшін Ауыл шаруашылығы министрлігі жылжымайтын мүліктің бірыңғай мемлекеттік кадастры аясында мемлекеттік қызметтерді цифрландыру мәселелері бойынша заңнамаға түзетулер әзірледі.
Енгізілген өзгерістер қызметтерді қағазсыз көрсетуді, жер телімдерін коммуналдық қызметтермен қамтамасыз етуді үйлестіру тәртібін автоматтандыруды, жер қатынастары саласындағы бюрократиялық және сыбайлас жемқорлық алғышарттарын алып тастауды көздейді. Заң жобасы Мәжілісте қаралуда.