Қазақстан мен Қытай ветеринариялық жүйесіне аудит жүргізу үшін келісімшарт жасады

Қазақстандық ветеринариялық қызмет ҚХР Бас кеден басқармасымен ағымдағы жылдың қараша айының басында Қазақстанның ветеринариялық жүйесіне аудит жүргізу және мал шаруашылығы өнімдерін экспорттауға мүдделі кәсіпорындарды инспекциялау үшін ҚХР Бас кеден басқармасы сарапшыларының сапары туралы келіссөздер жүргізді.

Тараптарды талқылау шеңберінде Ветеринариялық бақылау және қадағалау комитетінің басшысы Б. Абызбаев жоғарыда аталған сапарды ұйымдастырудың қазақстандық тарапының дайындығы туралы атап өтті. Сондай-ақ Тараптар ветеринариялық жүйенің (инспекцияның) алдағы аудитінің егжей-тегжейін және мал шаруашылығы өнімдерін өндіру объектілеріне бару бағдарламасын талқылады. Сонымен қатар, қытай тарапы кәсіпорынды инспекциялау кезінде ауыл шаруашылығы жануарларын ұстаудан бастап өнімді экспортқа жіберу пунктіне дейінгі барлық тізбекті көргілері келетіндігі туралы айтты.

«Жақын арада біз ҚХР Бас кеден басқармасы енгізген аусыл мен құс тұмауы бойынша шектеулерді Қазақстанға қатысты алып тастай аламыз деп үміттенеміз, бұл қазақстандық өндірушілерге өз өнімдерін өткізу нарығын кеңейтуге мүмкіндік береді», - деп атап өтті Б.Абызбаев.

Аусыл және құс тұмауы бойынша шектеулерді алып тастау қазақстандық ветеринариялық қызмет жұмысының басым бағыттарының бірі болып табылады. Бұл қазақстандық өндірушілер үшін ірі өткізу нарықтарының бірі болып табылатын Қытайға мал шаруашылығы өнімдерінің экспортын ұлғайтуға мүмкіндік береді.