Қазақстандық аграршылар егістіктер мен жайылымдарды сақтандыра алады

Ауыл шаруашылығы министрлігі дәнді және майлы дақылдарды, сондай-ақ жайылымдарды сақтандыру бойынша бағдарламаларды іске асыру жұмыстары басталғанын хабарлайды. Агроөнеркәсіптік кешендегі сақтандыру операторы - «Аграрлық несие корпорациясы». Сақтандыру шарттарын www.qoldau.kz сайтындағы Agroinsurance

Сақтандыруға болатын дақылдарға бидай, арпа, сұлы, жүгері, күнбағыс, рапс және зығыр жатады. Сақтандыру Ақмола, Ақтөбе, Шығыс Қазақстан, Батыс Қазақстан, Қарағанды, Қостанай, Павлодар, Солтүстік Қазақстан облыстарының аграршылары үшін қолжетімді.

Дәнді дақылдар бойынша топырақта ылғал жетіспеушілігінен сақтандыру шарттарын 2022 жылғы 16 сәуірге дейін, майлы дақылдар бойынша – 30 сәуірге дейін жасасуға болады.

Құрғақшылықтан сақтандыру бойынша сақтандыру кезеңі үш фазаға бөлінген. Егер егістер 15 мамырдан 14 тамызға дейінгі кезеңде (үш фазалы өнім) сақтандырылатын болса, онда сақтандыру полисінің құны сақтандыру сомасының 4,8% құрайды. Егер сақтандыру кезеңі 15 маусымнан 14 тамызға дейін жалғасатын болса (екі фазалы өнім), тариф сақтандыру сомасының 3,2% тең болады.

Өнімдер бойынша мемлекеттік қолдау сақтандыру сыйлықақыларын субсидиялау түрінде көзделіп отыр, ауыл шаруашылығы тауарын өндірушілер үшін сақтандыру полисі 50% арзандатылады.

Құрғақшылықтың басталуы сақтандыру компаниясының топырақтағы ылғал туралы жиналған мәліметтері негізінде есептейтін индекстер негізінде анықталады. Келесі маусымға есептеу кезінде әрбір аудан бойынша, оның ішінде өткен жылғы ауа райы деректері ескеріледі. Осылайша, индекс мәндері жыл сайын өзгеріп отырады. Сондықтан әлеуетті сақтанушылар сақтандыру шарттарын жасасу кезінде индекстердің жаңа мәндеріне назар аударуы қажет.

Егістіктерді құрғақшылықтан сақтандырудың екі жылының қорытындысы бойынша ауыл шаруашылығы тауарын өндірушілерге 1 млрд 327,3 млн теңге төленді, бұл ретте аграршылар енгізген сақтандыру сыйлықақысының сомасы 241,5 млн теңгені құрады, тағы 241,5 млн теңге мемлекеттік субсидиялар ретінде енгізілді.

Министрлік шаруалардың назарын жаңа өнім - жайылым биомассасы тапшылығының индексіне негізделген жайылымдарды сақтандырудың бекітілгеніне аударады. Бір жылдық және көп жылдық шөптері бар жайылымдарды сақтандыруға болады. Сақтандыру кезеңі – 1 мамырдан 30 тамызға дейін, тариф 3,2 %. Жайылымдарды 2022 жылғы 16 сәуірге дейін сақтандыру қажет.

Алқаптарды бақылау өсімдіктерді судың салыстырмалы мөлшерін тіркейтін және биомасса тапшылығы индексінің көрсеткіштерін қамтамасыз ететін жерді қашықтықтан зондтау көздерімен жүзеге асырылады.

Өнім бойынша 50% мөлшерінде сақтандыру сыйлықақыларын субсидиялау жүзеге асырылатын болады.

Шарт жасағаннан бастап сақтандыру төлемдеріне дейінгі барлық рәсімдер электрондық платформада жүргізіледі. Процестерді автоматтандыру адами фактордың әсерін болдырмауға мүмкіндік береді және олардың ашықтығын қамтамасыз етеді.

Жүйеде Қазақстан Республикасының Қаржы нарықтарын реттеу және дамыту жөніндегі агенттігінің лицензиясы бар сақтандыру компаниялары жұмыс істейді. Сондай-ақ жұмыс істеу үшін әлемдік нарықта «а» рейтингі бар үш халықаралық қайта сақтандыру компаниясы тартылды, олар отандық компаниялар өзіне алған тәуекелдерді қайта сақтандырады. Бұл өз активтерін сақтандырған компанияларға кепілдендірілген төлемдерді қамтамасыз етуге мүмкіндік береді.

Источник https://www.gov.kz

Фото eldala.kz