«Бір құстан – 80 келі ет» Түйеқұс шаруашылығы
Қызылорда облысында тұңғыш түйеқұс шаруашылығы пайда болды. Сырдария ауданына алғашқы құстар әкелінсе, бір айдан кейін өңірге 100 бас африкалық түйеқұс әкелінбек. Бұл туралы «Хабар 24» телеарнасының сюжетінде айтылған.
Бесарық ауылына 12 африкалық түйеқұстың партиясы жеткізілді. Құстар бірнеше күн карантинде болады. Кейін олар арнайы бөлмеге ауыстырылады. Мал басы көбейеді, ол үшін инкубатор да бар.
Басты мақсат – ет және жұмыртқа өндірісін жолға қою. Дайын өнімді ішкі және сыртқы нарыққа шығару жоспарлануда. Айтпақшы, бір құстан 80 келіге дейін ет алуға болады.
"Бір келі еттің құны жеті мыңнан 12 мың теңгеге дейін. Барлығы сұранысқа байланысты. Жұмыртқа бағасы үш-бес мың, ал бір жұмыртқаның салмағы төрт келіге дейін жетеді", - дейді директордың орынбасары Жасұлан Әбдірашитұлы.
Бір маусымда бір аналықтан шамамен 60 жұмыртқа алуға болады. Мамандар түйеқұстардың өңірдің қатаң климатына тез бейімделетінін айтады. Ауыр салмақты құстар ыстық пен суыққа оңай шыдайды. Малға берілетін жоңышқа мен аралас жемді рахаттана жейді. Түйеқұстарды дамыту жобасы сәтті жүзеге асса, тағы 10 тұрақты жұмыс орны ашылады.
"Біз үш миллиард теңгені құрайтын жобалардың тізбесін жасадық. Өңіріміз ауылшаруашылық саласы болғанымен, өңдеу өнеркәсібі мен қызмет көрсету саласына да басымдық береміз", - дейді облыстық кәсіпкерлік, өнеркәсіп және туризм бөлімінің басшысы Алмат Сәдуақасов.