Егіс алқабы қурап кеткен жамбылдық шаруалардың шығыны өтеледі - министр
Жамбыл облысында құрғақшылыққа байланысты егіс алқабы қурап кеткен фермерлердің шығыны өтеледі. Бұл туралы Үкімет отырысынан кейін БАҚ өкілдерінің сауалына жауап берген Ауыл шаруашылығы министрі Ербол Қарашөкеев айтты.
«Жамбыл облысында алқаптарды суару кезеңінде су тапшылығы болды. Атап айтқанда, көршілес Қырғызстаннан су келмеді. Сондықтан Жамбыл облысында қурап кеткен алқаптар бар. Олардың аумағы - 7,8 мың гектар. Осыған байланысты Үкімет аймақтық деңгейдегі төтенше жағдай жариялау шешімін қабалдады», - деп жағдайды түсіндірді Ербол Қарашөкеев.
Министр қуаңшылықтан зардап шеккен егіс алқаптарында болып, жағдайымен танысқанын жеткізді.
Ол атап өткендей, шаруаларға келген залал мемлекет есебінен өтеледі.
«Аймақтық деңгейдегі төтенше жағдай жарияланғанда алқаптарға жүргізілген ғылыми-сараптамалық негіздемеге сай резервтен қаражат бөлінеді. Ол ақша шығын көрген фермерлерге беріледі», - дейді Ербол Қарашөкеев.
Еске салайық, бірнеше сағат бұрын Премьер-Министрдің өкімімен су тапшылығы болған Жамбыл облысындағы 6 ауданда өңірлік ауқымдағы табиғи сипаттағы төтенше жағдай жарияланды.
Сонымен қатар бүгін өткен Үкімет отырысында Премьер-Министр Әлихан Смайылов биыл құрғақшылық салдарынан жиналатын өнім көлемі азайып қалуы мүмкін екенін айтты.