Елімізде алғаш рет лецитин майы ШҚО-да өндірілмек

Шығыс Қазақстан облысында май тұқымын қайта өңдеу көлемі 900 мың тоннаға жетеді. Бұл туралы облыс әкімі Ермек Көшербаев айтты, деп хабарлайды Kazinform.Әкімнің айтуынша, облыс майлы дақылдарды қайта өңдеу бойынша жеткілікті қуатқа ие.

«Шығыс Қазақстанда май өндіретін 12 кәсіпорын бар. Қуаты 50 мың тонна болатын жаңа «Алтай май» зауытын іске қосу жоспарланып отыр. Бұған дейін жұмыс істеп тұрған және жаңа кәсіпорындарды ескерсек, май тұқымын қайта өңдеу көлемі 900 мың тоннаға жетеді. Өсімдік майының экспорты 2 есе өседі деп болжанып отыр», - деді Е.Көшербаев Орталық коммуникациялар қызметінде өткен баспасөз мәслихатында.
Жақында Шанхай қаласында қазақстандық май өнімдерін жеткізу шарттарына қол қойылды. Оның ішінде шығысқазақстандық кәсіпорындар да бар.

«Біздің облыс Қазақстанда алғаш рет лецитин өндіруді қолға алып отыр. Жылына 4 мың тонна сұйық лецитин өндіру үшін күнбағыс тұқымын терең өңдеуді енгізуде. Ал 2025 жылдан бастап құрғақ ұнтақты лецитин шығару жоспарланды», - деді Ермек Көшербаев.
Жалпы облыста агроөнеркәсіптік кешенде 236,4 млрд теңгеге 37 жоба іске асырылып жатыр.
Айта кетейік, Ермек Көшербаев елордада Шығыс Қазақстан облысының әлеуметтік-экономикалық дамуы туралы есеп беріп жатыр.
Бұған дейін өңір басшысы Шығыс Қазақстан облысындағы орташа жалақы 305 мың теңге екенін айтқан еді.
Сондай-ақ Шығыс Қазақстан облысында екі су қоймасы жаңғыртылады және жаңа су қоймасы салынады.