Импортталатын ауыл шаруашылығы техникасын сатып алуға субсидия беру азайтылады – Әлихан Смайылов
Импортталатын ауыл шаруашылығы техникасын сатып алуға субсидия беру азайтылады. Бұл туралы бүгін Үкімет отырысында Премьер-Министр Әлихан Смайылов айтты.
«Индустрия министрлігі мүдделі мемлекеттік органдармен және ұйымдармен бірлесіп, қысқа мерзімде Машина жасауды дамытудың кешенді жоспарын келісіп, тиісті қаулыны енгізуі қажет. Осы жоспардың іс-шараларын уақытылы әрі сапалы орындау үшін барлық іс-шараларды қабылдауы керек», - деді Әлихан Смайылов.
Үкімет басшысы Энергетика, Индустрия және инфрақұрылымдық даму министрліктеріне мүдделі мемлекеттік органдармен және ұйымдармен бірлесіп, Халықаралық мұнай-газ машина жасау орталығының тиімділігін арттыруды тапсырды. Сонымен қатар мұнай-газ операторларының өндірісінде отандық өнімнің үлесін арттыру қажеттігін ескертті.
«Біз отандық өндірісті дамыту үшін импортталатын ауыл шаруашылығы техникасын сатып алуға субсидия беруді азайтуды көздеп отырмыз. Индустрия, Ауыл шаруашылығы министрліктері мүдделі мемлекеттік органдармен бірлесіп, Қазақстанда баламалары бар импорттық ауыл шаруашылығы техникасына инвестициялық субсидия беру мөлшерлемесін 25-тен 15 пайызға дейін төмендету мәселесін пысықтауы қажет», - деді Премьер-Министр.