Кеңесші органдардың санын қысқарту саладағы қордаланған мәселені өзгерте ала ма?

Тарату жөнінде шешім –   Аграрлық  саясат жөніндегі кеңес, Ғылыми-техникалық кеңес және Жер қатынастарын дамыту мәселелері жөніндегі сараптамалық кеңеске қатысты қабылданған. 

Ол Мемлекет басшысының 3 сәуірдегі «Мемлекеттік аппараттың қызметін бюрократиясыздандыру шаралары туралы»  Жарлығы аясында жүзеге асып отыр.  Оны орындау үшін мемлекеттік органдар екі ай мерзім ішінде консультативтік-кеңесші органдардың ( ККО) санын екі есе қысқартуы керек болған еді. Соның нәтижесінше енді бұл  министрлікте бүгінгі таңда үш ККО жұмыс істейді. Олар: Жеке кәсіпкерлік мәселелері жөніндегі сараптамалық кеңес, Агроөнеркәсіптік кешенді дамыту мәселелері жөніндегі қоғамдық кеңес және Мемлекеттік аудит және тәуекелдер жөніндегі кеңес.

Министрлік сайтында таратылған консультативтік-кеңесші органдардың  қандай талаппен таңдап алынғаны туралы мәлімет жоқ.  Аграрлық саясат да, ғылым мен техника да, жер қатынастары да  әлі күнге дейін өзектілігін жоймай отырған кезде оларды қысқартуға қаншалықты қажеттілік барын Ербол Қарашөкеев халықпен есепті кездесуінде енді өзі түсіндіріп беретін шығар.

Ерлік ЕРЖАНҰЛЫ, журналист