Маңғыстау облысында шаруаларға 2,5% микронесие беріледі

«Ауыл халқының табысын арттыру» пилоттық жобасы негізінде әр жыл сайын іріктелген ауылдық округтерде іске асады. Атап айтқанда Өмірзақ, Рахат, Кендірлі, Бейнеу, Боранқұл, Құрық, Сенек, Жетібай, Шетпе, Жыңғылды, Тұщықұдық, Батыр, Маңғыстау, Баянды, Қызылтөбе, Дәулет, Сайын Шапағатов, Ақшұқыр, Баутин ауылдарында жүзеге асырылмақ.

«Жобаның мақсаты – ауыл тұрғындарын жұмыспен қамту және әлеуетін көтеру, ауыл шаруашылығы саласын дамыту.

Маңғыстау облысында ауыл шаруашылығына қатысты жеке кәсіпкерлерге – 8,6 млн теңгеге дейін, ал кооперация иелеріне 27,6 млн теңгеге дейін 2,5 пайызбен микрокредит берілмек. Микрокредит мерзімі 5-тен 7 жылға ұсынылады.

Жоба аясында 2023 жылдың соңына дейін өңірде 170 кәсіпкер микронесие алады деп күтілуде. Жоба сәуір-мамыр айларында басталады», - дейді Маңғыстау облыстық ауыл шаруашылығы басқармасының басшысы Қазбек Тәшімов.

Микрокредит алу үшін төмендегі талаптар қойылады:

1) Кепілдің болуы;

2) ҚР-дың салық заңнамасына сәйкес салық органдарында тіркеудің болуы;

3) Бизнес-жобасының болуы.

Микрокредит алу үшін қажетті құжаттар:

1. Өтініш;

2. Жеке басты куәландыратын құжат;

3. Кредит алу тарихы;

4. Субъектінің барлық мәліметтерді беруге және алуға келісімі;

5. Бизнес-жоспар;

6. Қарыз алушының уәкілетті органының микрокредит алу, мүлікті кепілге беру жөніндегі мәмілені мақұлдау туралы шешімі;

7. Ресімделген мүлікті кепілге беру жөніндегі кепіл берушілердің келісімі;

8. Қызмет көрсететін банктен шоттың бар екендігі туралы анықтама;

9. Несиелік берешектің, оның ішінде қаржы ұйымдарынан мерзімі өткен берешектің болуы туралы анықтама (кредиттер болған кезде);

10. Қарыз алушының жалақысын және/немесе өзге де кірістерін растайтын құжат (жинақтаушы зейнетақы қорының үзінді көшірмесі);

11. Бағалау туралы есеп;

12. Кепіл беруші және кепілмен қамтамасыз ету жөніндегі құжаттар.