Маңғыстау жыл сайын мал азығының 75 пайызын басқа облыстардан алады

«Азық-түліктің дүкендегі бағасына әсер ететін артық делдалды алдымен мейлінше азайтып, содан кейін бәрінен арылу керек. Тамақ өнімдерін сақтайтын орындарды көбейту – өзекті мәселе. Қазір мұнда көтерме сауда және тауарды бөліп-тарату орталығы салынып жатыр. Оның құрылыс жұмыстарын уақтылы аяқтау қажет. Жаңа қоймалар салу үшін әкімдік жеке инвесторларға дайын инфрақұрылымы бар жер беруі керек. Біз азық-түлік өнімін өндірушілерді алдын ала қаржыландыру тәсілін енгіздік. Мұны облыстың әлеуметтік-кәсіпкерлік корпорациясы тиімді пайдалануына болады. Өнімді сатып алу үшін өзге өңірлердегі шаруалармен алдын ала келісімшарт жасауға мүмкіндік бар. Бұл жұмыста бәрін дер кезінде жасау өте маңызды» деп атап өтті Президент.

Оның айтуынша, н арықтың беталысын мұқият зерделей отырып, ертерек қамданған абзал.

Былтыр қатты қуаңшылықтың және жемшөп тапшылығының кесірінен ауыл халқы қаншама малынан айырылды. Мұндай жағдайдың қайталануына жол беруге болмайды.

«Облыс халқы қиындыққа тап болғанда жұртымыз бүкіл ел болып көмек қолын созды, берекелі бірлігін көрсетті. Маңғыстау облысы жыл сайын мал азығының 75 пайызын басқа облыстардан алады. Сондықтан, жемшөптің бағасын арзандату мәселесі өте өзекті. Жергілікті жемшөп қорын көбейту қажет. Өзге өңірлерден мал азығын тасымалдау үшін жеңілдетілген тариф енгізу жолын қарастыру керек. Агроөнеркәсіп кешенінің өнімділігін арттыру үшін ғылыми мекемелермен тығыз ынтымақтастық орнату маңызды. Сондай-ақ, қолда бар мүмкіндікті және өңірдің ерекшеліктерін тиімді пайдаланған жөн. Мысалы, бұл жақта жыл бойы – күн ашық. Сондықтан, жылыжай салу арзанға түседі. Оның жылуы мен жарығына электр қуаты аз жұмсалады. Суы аз, топырағы құнарсыз жерде ауыл шаруашылығын дамытудың бірден-бір жолы – жаңа технологияларды енгізу. Ауа райы осы аймаққа ұқсайтын Израиль сияқты елдердің озық тәжірибесін мұқият зерттеу қажет», - дейді Қасым-Жомарт Тоқаев.