Мал шаруашылығын қаржыландыруда енді жем-шөп базасын дамытуға басымдық беріледі

Премьер-Министр  Әлихан Смайыловтың төрағалығымен өткен жиында баяндама жасаған Ауыл шаруашылығы министрі Ербол Қарашөкеевтің айтуынша, бүгінгі таңда ірі азықпен қамтамасыз ету 80 пайызды, шырынды азықпен қамтамасыз ету 40 пайызды, құнарлы азықпен қамтамасыз ету 50 пайызды құрайды. 

Үкімет басшысы да жыл сайын елімізде жем-шөп қажетті зоотехникалық нормадан 2 есе аз дайындалатын және бұл оның бағасына әсер етіп жатқанын атап өтті. Ауыл шаруашылығы министрлігі мен облыс әкімдіктеріне жем-шөп дақылдарының егіс алқаптарын көбейтіп, шалғайдағы жайылымдардың инфрақұрылымын жаңғыртуды тапсырып, бұл жұмыстарды қаржыландыруға басымдық беру керектігін айтты. Сондай-ақ мал шаруашылығы өнімдерін қайта өңдеумен айналысатын кәсіпорындардың өндірістік қуаттарын толық пайдаланбауына байланысты оларды ұсақ өндірушілермен байланыстыратын дайындаушы ұйымдар желісін құруға ынталандыру қажеттігін де тапсырды. Бұған дейін субсидиялаудың жоғары сыбайлас жемқорлық сипатқа ие селекциялық-асыл тұқымдық жұмысқа шамадан тыс шоғырлануы, мал бордақылау алаңдары мен ет өңдеу кәсіпорындарының жартылай жүктелуіне алып келген еді.

«Фермерлер мен инвесторлар заманауи технологиялар мен ғылыми жаңалықтарды енгізуге қаражат бөлуге мүдделі болуы тиіс. Жалпы, мал шаруашылығын дамыту мемлекеттік органдардың, фермерлердің, бизнестің, ғылым мен ветеринарияның ортақ позициясы мен бірлескен күш-жігерінің арқасында ғана нәтижелі болмақ», — деді Ә.Смайылов.

Жалпы Ауыл шаруашылығы министрлігі былтыр «Жем-шөп өндірісі саласын дамытудың 2022-2025 жылдарға арналған жол картасын» әзірлеген болатын. Алайда, онда көрсетілген іс-шараларды жүзеге асыру бойынша әлі де жергілікті жерлерде жүйелі жұмыс жоқ. Мал шаруашылығын жем-шөп базасын есепке алмай дамыту жалғасуда. Сондықтан саланың даму қарқыны еліміздің қолда бар әлеуетті мүмкіндіктеріне сәйкес келмейді. Қолда бар мүмкіндіктер мал шаруашылығы өнімдерін өңірлік қана емес, әлемдік экспорттаушылардың арасында болуға мүмкіндік бергенімен құс еті, ет және сүт өнімдері бойынша еліміз өзге тұрмақ өзін-өзі қамтамасыз ете алмай,  импортқа тәуелді болып отыр.  Министрліктің есебіне қарағанда, 2021 жылы мал шаруашылығында жалпы сомасы 70 млрд теңгеге жуық 53 инвестициялық жоба іске асырылған. Биыл да жалпы сомасы 100 млрд теңгеден асатын 62 жобаны іске асыру жоспарланып отыр.