Министрлік Qoldau.kz арқылы рәсімделген субсудияларға қатысты мәліметтерді тексермек
Ауыл шаруашылығы министрлігі Qoldau.kz арқылы берілген субидиялар бойынша анықталған сәйкессіздіктерді тексеріп, құқық қорғау органдарына жолдамақшы.
Бұл жайында мемлекеттік көрсетілетін қызметтерді дамыту және агроөнеркәсіп кешенін цифрландыру департаментінің директоры Бернат Алпысбеков мәлім етті, деп хабарлайды ҚазАқпарат тілшісі.
Таныстырылым кезінде министрлік өкілі ауыл шаруашылығы тауарларын өндірушілерден субсидия өтінімдерін қабылдауға арналған Qoldau.kz платформасының орнына Gosagro.kz. плтаформасы іске қосылғанын айтып, оның бұрынғы платформадан ерекшелігі неде екенін түсіндірді.
Бернат Алпысбековтің айтуынша, субсидия өтінімінде 200 гектар алқапты өңдегені туралы мәлімет беріп, шын мәнінде 22 гектар алқапты өңдеген фермерлер кездескен. Жаңа жүйеде мұндай сәйкессіздіктер ғарыштан түсірілген деректер негізінде әшкереленіп, субсидия нақты істелген жұмыс шығынына ғана төленетін болады.
«Егіс алқаптарының картасында өңделгені ғарыштан түсірілген деректер арқылы расталған мәліметтермен сәйкеспейтін 30 факті бар. Бұдан әрі әр факт бойынша зерделеу керек – бәлкім Qoldau.kz-ке нақты өңдеген алқаптың көлемін дұрыс көрсеткен болуы да мүмкін. Әзірге біреуді жазғыруға ерте. Қолда бар фактілерді талдаймыз. Сол талдауды құқық қорғау органдарына береміз. Субсидияны мемлекетке қайтара ма, басқа шара қолдана ма, оны солар анықтайды. Ал біз баға бере алмаймыз. Бірақ «Қазастан Ғарыш сапары» мекемесінен түскен мәліметке әрекет ету мемлекеттік орган болғандықтан міндетіміз», - деді департамент директоры.
Дереккөз: https://www.inform.kz/kz/auyl-sharuashylygy_s10466