ҚОСТАНАЙ ОБЛЫСЫНДА ТҰҚЫМДЫҚ БИДАЙДЫҢ БАҒАСЫ 180 МЫҢ ТЕҢГЕГЕ ЖЕТТІ

Нарықта бидай тұқымының бағасы қазірдің өзінде тоннасына 180 мың теңгеден басталып жатыр. Ал ауыр кезеңді бастан кешкен фермерлерде оны сатып алуға қаражат жоқ. Келесі жылы егістік көлемі қысқаруы мүмкін. Бұл туралы Atameken Business арнасының сюжетінде айтылды.

Қостанайлық фермер Владимир Журжидің шаруашылығында егіннің 25 пайызға жуығы қар астында қалыпты. Ауа райы егінді дер кезінде жинауға мүмкіндік бермеген. Ал қамбада көктеп шыққан сапасыз бидай ғана бар.

«Ол бидай тұқымға кетеді деп айта алмаймыз. Алдымен сынақтан өткізіп, өну энергиясын тексеріп, содан соң ғана оның тұқымға жарап-жарамайтынын анықтауымыз керек. Бірақ тұқым параметрлері бойынша оның жарамайтыны сөзсіз. Тұқым қандай болса, өнім де сондай болады деп жиі айтамыз. Мұндай тұқыммен келесі жылы жақсы өнім ала алмаймыз», - дейді Владимир Журжа.

Ол қарыздарын қайтару үшін күзгі жауын басталмай тұрып-ақ қоймадағы сапалы бидайды сатып жіберіпті. Өңірдегі өзге де фермерлер осылай жасаған. Алайда ауыл шаруашылығы басқармасы келер жылға тұқым қоры жеткілікті екеніне сенімді.

«Бүгінде бізде тұқымның 99,4 пайызы бар. Біз аудан әкімдіктерімен де, ауылшаруашылық тауар өндірушілерімен де сатып алу мәселесі бойынша жұмыс істеп жатырмыз, өйткені бұл көктемгі егін жұмыстары кезіндегі маңызды. Менің ойымша, бірлесе отырып көктемгі егіс маусымын сәтті жүргіземіз. Әзірге ешқандай қауіп-қатерді болжап отырған жоқпыз», - деді Қостанай облысы әкімдігінің ауыл шаруашылығы басқармасының басшысы Ибрагим Бекмұхамедов.

Көктемгі егіс жұмыстарына облысқа 500 мың тоннадай тұқым қажет. Шенеуніктердің айтуынша, фермерлер оның басым бөлігін – 470 мың тоннадан астамын өз күшімен дайындаған. Бірақ астық өңдеушілер одағы ауыл шаруашылығындағы статистикалық мәліметтер шындыққа жанаспайды деп есептейді. Одақтың төрағасы Евгений Ганның айтуынша, шенеуніктер бұрынғы әдетіне басып, сандарды асыра көрсетіп жатқан болуы мүмкін.

Сапалы бидай тұқымының тапшылығына байланысты шаруалар шығыны аз басқа дақылдарға көшуге мәжбүр болады. Көптеген фермерде тұқым сатып алуға ақша жоқ. Ал несиелердің ұзаруын ескерсек, жаңа несиелердің берілуі екіталай. Бұл келесі жылы егістік көлемі қысқаруы мүмкін екенін білдіреді.