Пестицидтерді, асыл тұқымды малды және тірі ірі қара малды импорттаушыларға арналған салық жеңілдігі қалпына келтірілді

Қаржы министрлігінің  Мемлекеттік кірістер комитетінің баспасөз қызметінің хабарлауынша, Салық кодексіне 11 шілдедегі № 135-VII заңмен қосылған құн салығын әкімшілендіруге қатысты өзгерістер енгізілді. Оған сәйкес, пестицидтер (улы химикаттар), асыл тұқымды мал, қолдан ұрықтандыруға арналған жабдықтар және тірі ірі қара мал импорттау кезінде есепке алу әдісімен қосылған құн салығы төленетін тауарлар тізіміне енді.

         Бұл түзетулер бизнес-қауымдастығының ұсынысы негізінде енгізіліп отыр. Бұған дейін 2021 жылғы 20 желтоқсандағы заңмен аталған тауарлар жеңілдіктер тізілімінен алынып тасталған болатын. Енді импорттау кезінде есепке алу әдісімен қосылған құн салығы төленетін тауарлар бойынша талап қою мерзімі 5 жылға дейін ұзартылды. Аталған өзгеріс 2022 жылдың 1 шілдесінен бастап қолданысқа енді. Сонымен қатар, 434-баптың 2-тармағына енгізілген түзетулерге сәйкес, «айырбастауды жүзеге асырған кәсіпкерлік субъектілері» деген сөз «айырбастау кезінде шикізатты экспорттаушылар» деген сөзбен ауыстырылды және «шикізат экспортынан» деген сөздер алынып тасталды. Бұл нормалар шикізат экспортынан  түскен валюталық табыстың 50 пайыздан кем емес бөлігін ұлттық валютаға айырбастаған тұлғалар үшін қосылған құн салығының асып кеткен  сомасын оңайлатылған тәртіптен қайтаруға мүмкіндік береді.

Ерлік Ержанұлы