Премьер-Министр «Азық-түлік корпорациясы» жұмысын қайта құруды тапсырды

«Бүгінгі таңда жалпы сыйымдылығы 2 млн тоннаға жуық көкөністер мен жемістерді сақтайтын 1 200-ден астам нысан бар. Бұл – жеткіліксіз. Олардың көбі әбден ескірген. Жаңа көкөніс қоймалары қажет. Фермерлер Бірыңғай мемлекеттік субсидиялау ақпараттық жүйесіне шағым айтуда. Бұл саладағы өндіріске теріс әсерін тигізуі мүмкін», - деді Әлихан Смайылов Үкіметтің бүгінгі отырысында.

Премьер-Министр азық-түлік қауіпсіздігін қамтамасыз ету жоспары бойынша жұмысты жалғастыруды тапсырды.
«Ауыл шаруашылығы министрлігі Сауда министрлігімен және өңір әкімдіктерімен бірлесіп, нарықтың нақты қажеттілігін ескеріп, Жаңа көкөніс қоймаларын салу және қолданыстағы қоймаларды жаңғырту бойынша кешенді жоспарды өзектендіруі қажет. Ауыл шаруашылығы министрлігі өңір әкімдіктерімен бірлесіп, барынша қысқа мерзімде субсидиялау онлайн-платформасының тиісті жұмысын қамтамасыз етуі керек. Сауда және интеграция министрлігі жергілікті атқарушы органдармен, «Қазақстан темір жолы» компаниясымен бірлесіп, маусым айының соңына дейін әлеуметтік маңызы бар азық-түліктің қажетті өнімдерін сатып алуды, оның ішінде көрші елдерден әкелуді қамтамасыз етсін», - деді Ә. Смайылов.
Сондай-ақ, Ауыл шаруашылығы министрлігіне «Азық-түлік корпорациясы» жұмысын еліміздің азық-түлік қауіпсіздігін және әлеуметтік маңызы бар азық-түлік тауарларының бағасын тұрақтандыруға бағыттай отырып, қайта құру тапсырмасы берілді.