СҚО-да егін егу науқаны аяқталды
Солтүстік Қазақстан облысында көктемгі егіс науқаны аяқталды. Биыл өңір диқандары 4,5 млн га алқапқа дақыл екті. Бұл – былтырғы егістік аумағымен бірдей.
СҚО ауыл шаруашылығы және жер қатынастары басқармасының мәліметінше, осы жылы шаруашылықтар 3,4 млн га дәнді, 751 мың га-ға майлы дақыл септі. Сондай-ақ, 379 мың га-ға жем-шөп, 26 мың га-ға картоп, 5 мың га-ға көкөніс екті.
«Өңірде дәнді дақылдарды себудің оңтайлы мерзімі бар. Жауын-шашынға қарамастан диқандар бұл жұмысты уақытында аяқтап отыр. Биыл сортты жаңарту көрсеткіші 10% жеткізілді. Жақсы өнім алу мақсатында 3 млн га алқапқаа 256,6 мың тонна минералды тыңайтқыш енгізу жоспарланған.
Былтырғы күздегі жауын-шашынды және биылғы тасқынды ескеріп, диқандарға қазақстандық зауыттар минералды тыңайтқыш бағасын бөліп төлеуге мүмкіндік беріп отыр. Қазір 60% төлесе, қалғанын күзде, егін жинағаннан кейін бере алады.
Науқанға литрі 250 теңгеден арзандатылған жанар-жағармай берілді. Мерзімінде аяқтауға әртүрлі модификациядағы 12,7 мың трактор, 14 мың астық сепкіш, 1,5 мың заманауи жоғары өнімді егіс кешендерінің септігі тиді», - дейді ведомствоның басшысы Мейрам Меңдібаев.
СҚО-ға мемлекет ауыл шаруашылығы саласын дамытуға 60,8 млрд теңге бөлді, оның 20,4 млрд теңгесі өсімдік шаруашылығына жұмсалады.