СҚО-да тоқтаусыз жауыннан егін орағы кешеуілдеп жатыр
Солтүстік Қазақстан облысында жауын-шашынның салдарынан егін орағы шамамен бір аптаға кешеуілдеп жатыр. Әзірге дәнді және дәнді-бұршақты дақылдардың тек 27% жиналды.
СҚО Ауыл шаруашылығы және жер қатынастары басқамасының мәліметінше, тамыз айында 51,9 мм мөлшерінде жауын жауған. Бұл әдеттегі нормадан 108% артық. Жоғары ылғалдылық піскен астықты жинап алуды қиындатты. Салдарынан 30 тамыздан бастап 6 қыркүйекке дейін егін орағы уақытша тоқтатылды.
Жауын-шашын басылып, ауа райы тұрақтанғаннан кейін өңір диқандары науқанға қайта кірісті.
Қазіргі уақытта СҚО-да 919,1 мың га дәнді және дәнді-бұршақты алқаптың астығы бастырылды. Бұл – барлық аумақтың 27%.
Күзгі дала жұмыстарына 13 мың техника жұмылдырылған. Егін орағына 58,9 мың тонна арзандатылған дизель отыны бөлінді.
Өңірде 317 астық кептіргіш бар, олардың өнімділігі сағатына – 9,7 мың тонна. Бүгінде барлығы іске қосылған. Жауын-шашынға байланысты қазіргі уақытта Ауыл шаруашылығы министрлігінде өңірлерге арзан бағамен қосымша дизель отынын бөлу мәселесі қарастырылып жатыр. Жанар-жағармай бидайды кептіруге пайдаланылмақ.
Ал «Қазгидромет» РМК мәліметінше, СҚО-да 11-12 қыркүйек күндері тағы да жауын жаумақ.