СҚО диқандары әр гектардан 12 центнерден астық алып жатыр
Солтүстік Қазақстан облысында егін орағының басталғанына бір апта өтті, осы аралықта барлық алқаптың 18% өнімі жинап алынды. Өңір басшысы Айдарбек Сапаров күзгі науқанның барысы туралы бүгін ҚР Үкімет отырысында айтып берді.
Биыл СҚО диқандары 4,5 млн гектардан өнім алуы керек. Өңірде орақ науқаны 15 тамызда басталды.
Шаруашылықтар жаппай егін жинауға 20 тамыздан бастап кірісті.
Бүгінгі күні дәнді дақылдардың 614 мың гектарынан өнім алынды.
Әр гектардан орта есеппен 12 центнерден бидай алынып жатыр. Майлы дақылдар бойынша өнімділік - 8 центнер.
«Барлық агротехникалық іс-шараларды сақтау және салаға инвестициялар тарту есебінен шығым өткен жылдың деңгейінде болады деген болжам бар. Топырақтың құнарлылығын арттыру мақсатында 2,3 млн га алқапқа 175 мың тонна минералды тыңайтқыш енгізілді. Жыл соңына дейін қосымша 25 мың тонна пайдаланылады. Жыл басынан бері 48,2 млрд теңгеге 1 768 техника алынды. Астық қабылдайтын пункттер астық қабылдауға толық дайын. Олар қажеттілікті толық жабады. Жанар-жағармай уақтылы жеткізіліп жатыр, диқандар үшін түпкілікті баға 250 теңге», - деді Айдарбек Сапаров.
СҚО-да жемшөп те жоспарлы түрде жиналып жатыр. Биыл оның алқабы 368 мың гектарға дейін ұлғайды.
Қазіргі уақытта жоспарланған 940 мың тонна шөптің 875 мың тоннасы дайындалды.