Шығыс Қазақстанда тағы бір су қоймасы салынады

Шығыс Қазақстан облысында екі су қоймасы жаңғыртылады және жаңа су қоймасы салынады. Бұл туралы облыс әкімі Ермек Көшербаев айтты.

«Президент өз жолдауында су ресурстарын ұтымды пайдалануға ерекше назар аударды. Шығыс Қазақстан облысында республика су айдындарының 40%-ы шоғырланған. Ауыл шаруашылығын дамыту үшін су – өнімділікті арттырудың негізгі факторы. Келесі жылдан бастап Үйдене және Қандысу атты облыстағы ірі су қоймаларында қайта жаңғырту жұмыстары басталады. Сондай-ақ Зайсан ауданындағы Кендірлік өзенінде су қоймасын салу жоспарланып отыр», - деді Е.Көшербаев Орталық коммуникациялар қызметінде өткен баспасөз мәслихатында.
ШҚО әкімінің айтуынша, нәтижесінде суармалы және егістік жерлердің көлемі 30 мың гектарға дейін ұлғаяды және алдын ала есептеу бойынша 830 фермерлік шаруашылықты сумен қамту мүмкіндігі болады.
Айта кетейік, Ермек Көшербаев елордада Шығыс Қазақстан облысының әлеуметтік-экономикалық дамуы туралы есеп беріп жатыр.
Бұған дейін өңір басшысы Шығыс Қазақстан облысындағы орташа жалақы 305 мың теңге екенін айтқан еді.