Түркістан облысында салмағы 230 келі қой Қазақстанның рекордтар кітабына енді

Миллион атты қошқар 4 жаста.

Түркістан облысы Сарыағаш ауданындағы қожалықта Қазақстан бойынша ең ірі қой салмақты қой тіркелді. Бұл туралы Қазақстан рекордтар кітабының ресми өкілі Қуаныш Құдайбергенов хабарлады. Қошқар иесі Қуаныш Мықтыбаев бұл рекордтың ТМД мен дүние жүзінде де үлкен жетістік екенін айтады.

"Қазақстанның КИнЭС рекордтар кітабына "Миллион" атты қошқарым тіркелейін деп жатыр. Астанадан арнайы маман келіп, таразының дұрыстығын гирялармен тексердік. Ет-май өнімділігі бағытындағы тұқымды тіркесек, бұл ТМД елдері арасында ғана емес, бүкіл дүние жүзі бойынша үлкен жетістік", – деді Қуаныш Мықтыбаев. 

КИнЭС ресми өкілі Қуаныш Құдайбергенов мұны әлем рекордына тән көрсеткіштердің бірі екенін атап өтті. 

"Нақты салмағы – 230 кг. Қазақстан рекордтар кітабы атынан сертификат Қуаныш Мықтыбаевқа тапсырылады және ет-май өнімділігі бағытындағы қошқардың салмағы 230 кг екенін растайды, еліміздегі ең ірі салмақты қой ретінде тіркейді", – деді Қуаныш Құдайбергенов.  

дереккөз: 

Түркістан облысында салмағы 230 келі қой Қазақстанның рекордтар кітабына енді | informburo.kz