Ветеринариялық бақылау және қадағалау комитетінің төрағасы өзгерді

ҚР Ауыл шаруашылығы министрі Ербол Қарашөкеевтің бұйрығымен Асқар Шакенұлы Жақыпбаев Ветеринариялық бақылау және қадағалау комитетінің төрағасы қызметіне тағайындалды. Комитеттің бұрынғы төрағасы Арман Кәрімұлы Өтеғұлов 2020 жылдың 27 тамызында ҚР Үкіметінің қаулысымен қызметінен босатылған еді. Сондықтан осы уақытқа дейін төрағаның міндетін Бауыржан Абызбаев атқарушы боп келген. Ал 1964 жылы Батыс Қазақстан облысында дүниеге келіп, Саратов мемлекеттік зоотехникалық-ветеринариялық институтын, Батыс Қазақстан инженерлік-техникалық университетін, Қазақстан инновациялық және телекоммуникациялық жүйелер университетін бітірген Арман Өтеғұлов бұл қызметке 2018 жылы тағайындалған болатын.

Жаңа төраға Асқар Шакенұлы бұған дейін 2021 жылдың маусымынан бері Шығыс Қазақстан облысы бойынша Ұлттық кәсіпкерлер палатасының өңірлік филиалы директорының экономикалық мәселелер жөніндегі орынбасары болып қызмет еткен. Еңбек жолын 1980 жылы Мыңбұлақ совхозының құрылыс бөлімінде жұмысшы болып бастаған ол 1963 жылы Шығыс Қазақстан облысында дүниеге келген. бастаған ол 1963 жылы Шығыс Қазақстан облысында дүниеге келген. Семей зоотехникалық-ветеринарлық институты мен Алматы экономика және статистика академиясын бітіріп, 1986-1996 жылдары Мыңбұлақ кеңшарының ветеринар дәрігері, комсомол комитетінің хатшысы, Мыңбұлақ ауылы әкімдігінің ветеринар инспекторы болып жұмыс істеді. 1996-1997 жылдары Аягөз ауданының бас мал дәрігерінің эпизоотия жөніндегі орынбасары, 1997 жылы Семей облысы Ауыл шаруашылығы департаментінің бас маманы қызметін атқарды. Одан кейін 1999 жылға дейін ШҚО Ветеринария комитетінің эпизоотияға қарсы емдеу-профилактикалық бөлімінің жетекші маманы; меңгерушісі. 1999 жылы ШҚО ветеринариялық зертханасы ветеринариялық бақылау станциясы директорының орынбасары, басшысы; Шығыс Қазақстан облыстық ветеринариялық қадағалау эпизоотияға қарсы бөлімінің басшысы; ветеринариялық қадағалау бөлімі басшысының міндетін атқарушы – облыстың бас мемлекеттік ветеринариялық инспекторы болды. 1999-2002 жылдары Ауыл шаруашылығы министрлігінің ШҚО аумақтық басқармасы бастығының орынбасары, 2002-2006 жылдары ШҚО аумақтық инспекциясы бастығының орынбасары, 2006-2011 жылдары Ауыл шаруашылығы министрлігінің Агроөнеркәсіптік кешендегі мемлекеттік инспекция комитетінің ШҚО аумақтық инспекциясы басшысының орынбасары; басшысы. 2011 жылы Әкімшілік жұмыс басқармасының басшысы; Агроөнеркәсіптік кешендегі мемлекеттік инспекция комитетінің төрағасы. 2011-2016 жылдары Агроөнеркәсіптік кешендегі мемлекеттік инспекция комитетінің ШҚО аумақтық инспекциясының басшысы, 2016-2017 жылдары ШҚО ветеринария басқармасының басшысы, 2017-2019 жылдары ШҚО Ауыл шаруашылығы басқармасының басшысы. Ал 2019-2021 жылдары ШҚО бойынша Ұлттық кәсіпкерлер палатасының өңірлік филиалының АӨК дамыту бөлімінің басшысы болған еді.

Е.КЕБЕКБАЙ, журналист