Түркістан облысында ауыл әкімдері мал санын қолдан өсіріп, өтірік ақпарат беріп келген
Түркістан облысында ауыл әкімдері мал саны бойынша бұрмаланған ақпарат беріп, жайылым жерге деген қажеттілікті артық көрсеткен. Мұндай заңбұзушылықты облыстық прокуратура қызметкерлері кезекті тексеру кезінде анықтады.
Қадағалаушы орган өкілдерінің айтуынша, мал басын жасанды түрде көбейту дерегі Арыстың бес ауылдық округінде тіркелген.
Мәселен, Ақдала ауылдық округінде жекенің қолындағы 1382 мал жайылымға мұқтаж болса, әкім өз есебінде шалғайдағы шаруашылықтың да төрт түлігін қосып көрсеткен.
Сөйтіп малдың санын 8817 деп беріпті.
Осылайша тиісті нормативтен артық жайылым қажет деп жалған ақпарат ұсынған.
«Мал есебі дұрыс жүргізілмеуі салдарынан мемлекеттік статистика бұзылған. Жер қатынастары басқармасы статистикаға берілген жалған мәліметті тексерусіз тек нормативтік қажеттілікке көбейтумен шектеліп, жайылым тапшылығын қолдан жасаған»,- дейді облыстық прокуратураның басқарма бастығы Нұржан Боранбаев.
Сондай-ақ, ауыл әкімдері мен ветеринария қызметі берген мал саны екі түрлі екені анықталған.
Жергілікті жерлерде жауаптылар жайылымдарды қайтару бойынша ақпараттық технологияларды қолданбайтын болып шықты.
Әрі мәжбүрлеп алып қою мен әкімшілік жауапқа тарту процедурасын да жүзеге асырмай келген.
Бүгінгі күнге қайтарылған жайылым көрсеткіштері басым бөлігі тек өз еріктерімен қайтару және әкімдердің арнайы қордағы жерден ортақ жайылымға бекітіп беруі есебінен орындалған.
Дереккөз: https://t.me/QazAqparat_kz