Заңсыз бас тартқан: ШҚО-да шаруаларға жайылым жерлер қайтарылды
Шығыс Қазақстан облысындағы бірнеше ауданның шаруалары мал жаюға арналған жерлерін қайтарды.
ҚР Мемлекеттік қызмет істері агенттігі ШҚО бойынша департаментінің мамандары «Е-лицензиялау» жүйесі арқылы Самар, Ұлан, Күршім және Зайсан аудандарының әкімдіктері шаруаларға жайылым жерлерін беруден бас тартқанын анықтады. Мұның себебін Жер кодексіндегі жер учаскелерін уақытша өтеусіз пайдалану негізінде беруді шектейтін өзгерістерге байланысты деп түсіндірді.
Алайда олардың осылай бас тартқандары заңға қайшы. Бұл заңдағы өзгерістер халыққа зиянын тигізбеуі тиіс.
- Жер кодексіне енгізілген жаңашылдықтардың кері күші жоқ, яғни бұрын бекітілген шешімдерге қолдануға жарамайды. Оның үстіне шаруалар өтініш берген кезде жер комиссиясының жер телімдерін бөлу туралы қорытындысы әлі күшінде болатын. Бұл азаматтардың құқықтарының бұзылып, жергілікті атқарушы органдардың өз өкілеттіктерін асыра пайдаланғанының дәлелі, - делінген ақпаратта.
Департаменттің араласуынан кейін шаруаларға жалпы көлемі 1500 гектардан асатын жер телімдері берілді. Бұл осындай келеңсіздікке тап болған басқа да шаруаларға үлгі болды.
Еске салсақ, осыған дейін Павлодарда шенеуніктер фермерлердің миллиардтаған инвестиция құйған жерлерін сотпен алып қойғаны хабарланған.
https://kaz.inform.kz/news/zansiz-bas-tartkan-shko-da-sharualarga-zhayilim-zherler-kaytarildi-e111c9/