Жаңа басшы «Бәйтерекке» өзгеріс әкеле ала ма?

Ақпан айының басында ҚР Премьер-Министрі Әлихан Смайылов «Бәйтерек» ұлттық басқарушы холдингі» АҚ ұжымына жаңа басшыны таныстырды. Бұрынғы басқарма төрағасы Айдар Әріпхановқа атқарған жұмысы үшін алғыс білдірген Үкімет басшысы жаңа басшы Қанат Шарлапаевтың әлемдегі ірі инвестициялық банктердің бірі – «Сити» құрылымдарындағы басқарушылық жұмыс тәжірибесін ерекше атап өтті. Сондай-ақ «Бәйтерек» холдингінің алдына қойылған маңызды міндеттер ретінде: қаржыландырудың қолжетімділігі мен ашықтығын арттыру, экономиканың шикізаттық емес секторларын, агроөнеркәсіп кешені және кәсіпкерлікті дамытуға жәрдемдесуді атап өтті.

1981 жылы Саратов облысында дүниеге келген Қанат Шарлапаев Саратов әлеуметтік-экономикалық университетін (РФ), Cranfield School of Management (Ұлыбритания) бітірген. Еңбек жолын 2003 жылы банк секторында бастап, 2006-2008 жылдары «Сити» инвестбанкінің (Ұлыбритания, Чехия) өңірлік кеңсесінің қаржы департаментінде, жобаларды басқару департаментінде, операциялық-технологиялық департаментінде, сату басқармасында жұмыс істеді. 2008-2014 жылдары — «Сити» инвестбанкінде (Лондон, Ұлыбритания) аға талдаушы, вице-президент көмекшісі, акциялар нарығындағы жұмыс жөніндегі өңірлік дивизионның вице-президенті болды. 2014-2015 жылдары «Сити» инвестбанкінің Еуропа, Таяу Шығыс және Африка бойынша стратегиялық жоспарлау және талдау өңірлік тобының вице-президенті (Лондон, Ұлыбритания), 2015-2017 жылдары «Ситибанк Қазақстанның» бас қаржы директоры, басқарма төрағасының орынбасары, аға вице-президенті, 2017-2020 жылдары Ресей Ситибанкінде Ресей, Украина және Қазақстан бойынша бас қаржы директоры, аға вице-президенті қызметін атқарды. 2020 жылдан 2022 жылдың ақпанына дейін «Сити» инвестбанкінің (БАӘ) Африка, Таяу Шығыс және Шығыс Еуропаның дамушы нарықтарындағы стратегия, жоспарлау және талдау жөніндегі өңірлік директоры болған еді.
Фото: http://kapital.kz/