Жетісу облысында жиын-терім науқаны аяқталып қалды

Жетісу облысында масақты-дәнді дақылдар, яғни арпа, бидай, сұлы толығымен орылып, 483,9 мың тонна астық бастырылды, орташа өнімділік гектарына 20,6 центнерден келді.

Жетісу облысы әкімінің баспасөз қызметі мәлім еткендей, себілген 324,426 мың гектар дәнді дақылдың 314 мың гектары немесе 96,8%-ы орылып, 786,3 мың тонна астық бастырылды. Орташа өнімділік - гектарына 25 центнер. Сондай-ақ 1,07 мың га жерден 3,41 мың тонна күріш жиналып, орташа шығымы әр гектарынан 32 центнер болды. Көкөніс пен бақша дақылдары да толық жиналды. Картопқа тоқталсақ, 11,9 мың гектардан 245,3 мың тонна жиналып, орташа өнімділік гектарына 206,8 центнерге жетті.

«Сол сияқты дәндік жүгерінің 56,99 мың гектары немесе 81,7% жиналып, 298,9 мың тонна өнім алынды. Майлы дақылдардың 80,6 мың гектары немесе 90,7% жиналып, 140,2 мың тонна өнім алынса, қант қызылшасының 7,6 мың гектары немесе 87,3% қазылып, 309,8 мың тонна өнім жиналды, орташа өнімділік гектарына - 405,1 центнер», - деп хабарлады облыстық әкімдіктен.

Ал диқандар биыл егістің бітік шыққанын айтады. Ақсулық Ринат Әдеспаев 10 жылдан бері дәнді дақыл өсірумен айналысады. Заманауи қондырғы пайдаланады, енді басқа да техникаларды сатып алмақ. 

«Биыл 800 гектарға бидай мен соя, 50-іне жоңышқа, 25 гектарға қызылша септік. 2022 жылы су шашырататын қондырғы сатып алып қойдық. Биыл мол өнім алдық», - деді Ринат Әдеспаев.

Ерен еңбегімен көпке үлгі болған Ринат Әдеспаев мол өнім алу бірнеше себепке байланысты екенін тілге тиек етті.

«Ауа райына, адамға байланысты, жердің құнарлығына байланысты, қарауыңа байланысты. Бәрі жақсы болса жақсы өнім аласың. Уақытында сеуіп, уақытында дұрыс қарау қажет. Дер кезінде дәрісін сеуіп, суғарып отырсаң еңбек еш кетпейді», - дейді ол.

Аудан орталығында ісін дөңгелетіп отырған азамат 10 адамды жұмыспен қамтыған. Болашақта шаруашылыққа жаңа қондырғылар алып, кәсібін кеңейтуді жоспарлап отыр. Ауыл шаруашылығы министрлігі атап өткендей, Қазақстан Республикасының агроөнеркәсіп кешенін дамытудың 2021-2030 жылдарға арналған тұжырымдамасы аясында «ҚазАгроҚаржы» АҚ жыл сайын 2023-2025 жылдары 30 млрд теңгеге дейін ұзақ мерзімді бюджеттік несие бөлуді көздеп отыр.